სამართალი
თურქეთის შეიარაღებული ძალების გენერალური შტაბის წარმომადგენელთა ვიზიტი
საქართველო, 13 იანვარი, საქინფორმი. საქართველოში ოფიციალური ვიზიტით თურქეთის შეიარაღებული ძალების გენერალური შტაბის წარმომადგენლები იმყოფებოდნენ. 22 თურქი სამხედრო მაღალჩინოსანი, გენერალ-ლეიტენანტ ათილა გიულანის ხელმძღვანელობით, საქართველოს თავდაცვის მინისტრმა ირაკლი ალასანიამ მიიღო.
თავდაცვის სამინისტროში გამართულ შეხვედრაზე ირაკლი ალასანიამ სტუმრებს საქართველოს შეიარაღებული ძალების განვითარებაში შეტანილი წვლილისა და ჰუმანიტარული მხარდაჭერისთვის მადლობა გადაუხადა. მხარეები ორმხრივი თანამშრომლობის საკითხებსა და სამომავლო გეგმებს შეეხნენ. საუბრის ერთ-ერთი თემა სამხედრო მრეწველობის სფეროში თანამშრომლობაც იყო. თავდაცვის მინისტრმა თურქეთის გენერალური შტაბის წარმომადგენლებთან საქართველოს ნატოში ინტეგრაციის საკითხებზე, ISAF-ის მისიასა და მის შემდგომ პერიოდზე, ასევე რეგიონში არსებულ უსაფრთხოების გარემოზე გაამახვილა ყურადღება.
თურქი სამხედრო მაღალჩინოსნები საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ მიიღო. შეხვედრას გენერალური შტაბის უფროსის მოადგილეები და შეიარაღებული ძალების მთავარი სერჟანტიც დაესწრნენ.
თურქეთის შეიარაღებული ძალების გენერალური შტაბის წარმომადგენელთა ვიზიტი საქართველოში გუშინ დასრულდა.
