აქტუალური
ცხინვალის კონფლიქტის ზონის მოსახლეობა - რუსეთთან ურთიერთობების შესახებ (ანონსი)
საქართველო, 17 დეკემბერი, საქინფორმი. მიმდინარე წლის 20 დეკემბერს, 13:00 საათზე, ქალაქ თბილისში, სასტუმრო „ვერე პალასში“ ორგანიზაციის „სახალხო მოძრაობა ქართულ-რუსული დიალოგისა და თანამშრომლობისათვის“ თაოსნობით გაიმართება შეხვედრა შიდა ქართლის რამდენიმე სოფლის მოსახლეობის წარმომადგენლებთან, ქართულ-რუსული ურთიერთობების შესახებ მათი აზრის გაცნობის მიზნით. პირველად ამგვარი შეხვედრა უშუალოდ გორის რაიონის სოფელ ბერშუეთში ა.წ. 11 დეკემბერს შედგა. სახალხო მოძრაობა აპირებს, რაც შეიძლება ხშირად გამართოს მსგავსი შეხვედრები.
ამჟამად „ვერე პალასში“ მოწვეულნი არიან როგორც ჟურნალისტები და სხვადასხვა არასამთავრობო ორგანიზაციების წარმომადგენლები, ისე საქართველოს პარლამენტის წევრები. სახალხო მოძრაობის გამგეობის წევრთა აზრით, აუცილებელია, ხალხის რჩეულებმა იცოდნენ ხალხის აზრი ისეთ უმნიშვნელოვანეს საკითხთან დაკავშირებით, როგორიც რუსულ-ქართული ურთიერთობებია.
შეგახსენებთ, რომ „სახალხო მოძრაობა ქართულ-რუსული დიალოგისა და თანამშრომლობისათვის“ ევრაზიის ინსტიტუტისა და ერთიანი საქართველოსათვის მებრძოლთა კავშირის ინიციატივით დაფუძნდა. სახალხო მოძრაობა თავის რიგებში დღესდღეობით 12 ათასამდე წევრს აერთიანებს.
შეკითხვებისათვის დაინტერესებულ პირებს შეუძლიათ, დარეკონ: 2-931902.
