სამართალი
შსს-მ ნარკოდანაშაულისა და იარაღის უკანონო შეძენა-შენახვისთვის ერთი პირი დააკავა
საქართველო, 12 დეკემბერი, საქინფორმი. შსს-ს თბილისის მთავარი სამმართველოს დეტექტივების სამმართველოს მე-3 განყოფილების თანამშრომლებმა, ჩატარებული ოპერატიული საგამოძიებო ღონისძიების შედეგად, 1975 წელს დაბადებული გიორგი გ. განსაკუთრებით დიდი ოდენობით ნარკოტიკული საშუალების და ცეცხლსასროლი იარაღის უკანონო შეძენა-შენახვის ბრალდებით დააკავეს.
სამართალდამცველებმა დაკავებულის პირადი და სამუშაო ოთახის ჩხრეკისას დიდი ოდენობით ნარკოტიკული საშუალება ამოიღეს, ხოლო საცხოვრებელი ბინის ჩხრეკისას - არარეგისტრირებული ცეცხლსასროლი იარაღი.
ექსპერტიზის დასკვნით, ამოღებულია 0,149021 გრ ბუპრენორფინი და „ბრაუნინგის“ მოდელის პისტოლეტი 1 მჭიდით და 5 საბრძოლო ვაზნით.
დაკავებული აღიარებს ჩადენილ დანაშაულს.
გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის (სსსკ-ის 260-ე მუხლის მე-3 ნაწილის „ა“ ქვეპუნქტით) და ცეცხლსასროლი იარაღის მართლსაწინააღმდეგო შეძენა-შენახვის ფაქტზე (სსსკ-ის 236-ე მუხლის 1-ლი ნაწილით) მიმდინარეობს.
