აქტუალური
ჯაჭვლიანი - ბარამიძეს: „ნუ ბლატაობ, შე ჩმორო!“
საქართველო, 11 დეკემბერი, საქინფორმი. პარლამენტში დეპუტატებს შორის ფიზიკური დაპირისპირება მოხდა. დეპუტატებს შორის შეხლა-შემოხლა მაშინ დაიწყო, როცა სოსო ჯაჭვლიანმა გიორგი ბარამიძეს მიმართა: “ნუ ბლატაობ, შე ჩმორო”, – რაზეც ბარამიძემ გინებით უპასუხა და მისკენ გაიწია, ამას კი დარბაზში დეპუტატებს შორის ხელაჩართული ჩხუბი მოჰყვა. ჩხუბის დროს გიორგი ბარამიძემ სოსო ჯაჭვლიანს მუშტი უთავაზა და წააქცია.
წაქცეული ჯაჭვლიანი გასაშველებლად მისულმა დეპუტატებმა ააყენეს, პარლამენტის თავმჯდომარემ 15-წუთიანი შესვენება გამოაცხადა. ამის შემდეგ"ნაციონალურმა მოძრაობამ" პარლამენტის დღევანდელ პლენარულ სხდომას ბოიკოტი გამოუცხადა და სხდომათა დარბაზი დატოვა.
შესაბამისი განცხადება უმცირესობის ერთ-ერთმა ლიდერმა გოკა გაბაშვილმა გააკეთა.
"დღეს სასაუბრო იყო თვითმმართველობის კოდექსზე, მაგრამ, სამწუხაროდ, უმრავლესობამ არჩია პარლამენტის დარბაზში სულ სხვა ვითარების შექმნა. ამ ვითარებაში სერიოზულ მსჯელობასა და კამათს, პროფესიულს, ნორმალურს, კოლეგიალურს ვერ მოვახერხებთ, ამიტომ დღეს ჩვენ დავტოვებთ სხდომას – უმცირესობა დატოვებს სხდომას", - განაცხადა გაბაშვილმა. ამასთან, მან დავით უსუფაშვილს მომხდარი ინციდენტის შეფასება სთხოვა.
