აქტუალური
ოპერაცია „გორდა II“
საქართველო, 6 დეკემბერი, საქინფორმი. ავღანეთში, ISAF-ის მისიის ფარგლებში, ბათუმის ცალკეულმა მსუბუქმა ქვეითმა ბატალიონმა თავის სამოქმედო არეალში მორიგი სამხედრო ოპერაცია განახორციელა. ბატალიონის “ბრავო” ასეულის ერთმა ოცეულმა ოპერაცია კოდური სახელით „გორდა II“ სოფელ კარეზ საფედში ჩაატარა.
ბოლო სამი წლის განმავლობაში დასახლებაში ხელნაკეთი ასაფეთქებელი ნივთიერებების აფეთქების 30-ზე მეტი ფაქტი დაფიქსირდა. ამავე სოფელში ბათუმის ბატალიონის წინამორბედმა 42-ე ბატალიონმა IED ბომბების სამალავი აღმოაჩინა.
სოფელში შესვლის შემდეგ ქართველმა და ამერიკელმა სამხედრო მოსამსახურეებმა ადგილობრივებთან მოლაპარაკება გამართეს. „გორდა II“ 5 საათის განმავლობაში გაგრძელდა. ჯარისკაცებმა სასურველი ინფორმაციის მოპოვება შეძლეს და ოპერაცია წარმატებით დაასრულეს. კომბინირებულ ოპერაციაში ქართველ და ამერიკელ ქვეითებთან ერთად ჯავშანმანქანა MRAP-ებიც მონაწილეობდნენ. კოალიციის ჯარისკაცების საჰაერო უსაფრთხოებას უპილოტო საფრენი აპარატი და “სუპერ კობრა“ მოდელის ორი საბრძოლო ვერტმფრენი უზრუნველყოფდა.
