საქართველო, 25 ნოემბერი, საქინფორმი. გუშინ, „ექსპო-ჯორჯიას“ საგამოფენო ცენტრში. 13:00 საათზე, პარტია "ქართული ოცნება - დემოკრატიული საქართველოს" მე-3 რიგგარეშე ყრილობა გაიმართა. ყრილობის დელეგატებს ირაკლი ღარიბაშვილმა მიმართა:
მოგესალმებით ყველას,
მივესალმები ყრილობის დელეგატებს!
მივესალმები მოწვეულ სტუმრებს!
განსაკუთრებული პატივისცემით მინდა  მივესალმო ბატონ ბიძინა ივანიშვილს და მადლობა გადავუხადო მას.

მადლობა იმისათვის, რომ დღეს ჩვენი სამშობლო თავისუფალია, მადლობა იმისთვის, რომ ჩვენ დავიბრუნეთ ჩვენი ქვეყანა, მადლობა იმისთვის, რომ განსხვავებული აზრისთვის აღარავის დევნიან, მადლობა სიცრუის დასრულებისთვის, ძალადობისა და უსამართლობის დამთავრებისთვის, მადლობა იმისთვის, რომ ქუჩაში ჩვენს ბიჭებს აღარავინ კლავს, ციხეებში პატიმრებს აღარ აწამებენ, მადლობა წართმეული უფლებების დაბრუნებისთვის, მადლობა ღირსების დაბრუნებისთვის, მომავლის იმედისთვის, მადლობა საქართველოს გადარჩენისთვის! მადლობა ყველაფრისთვის!

მადლობა ჩვენს ხალხს, ჩვენს მოქალაქეებს! რომ არა მათი სიმტკიცე და  გამძლეობა, თავდადება და მოთმინება, ეს გამარჯვება არ იქნებოდა. მადლობა მათ ამისათვის!

მადლობა ბატონ ბიძინას იმ დიდი ნდობისათვის, რომელიც მან გამომიცხადა და დამასახელა საქართველოს მთავრობის მეთაურად და ახლა უკვე პარტია ,,ქართული ოცნება - დემოკრატიული საქართველოს“ თავმჯდომარედ. მადლობა საქართველოს პარლამენტს, რომელმაც მე და ჩემს გუნდს ნდობა გამოგვიცხადა. ეს არის უდიდესი პასუხისმგებლობა და მე ვეცდები, ბატონებო, გავამართლო ყველას ნდობა და თავდადებით ვემსახურო ჩემს ქვეყანას და ჩემს ხალხს.

მეგობრებო,

დღეს პარტია ,,ქართულმა ოცნებამ“ დაამტკიცა პარტიის ახალი წესდება. ამიერიდან პარტია თვისებრივად ახალ ეტაპზე გადადის, შეიცვალა მისი სტრუქტურა და მმართველობის წესი. ახალი სტრუქტურა პარტიას საშუალებას მისცემს ორგანიზაციულად სწორად წარმართოს თავისი საქმიანობა, იყოს კიდევ უფრო ქმედითი, გაააქტიუროს თავისი საქმიანობა და დააკმაყოფილოს ყველა ის პირობა, რომელიც საჭიროა თანამედროვე ევროპული ტიპის პარტიისთვის, რომელიც ამავე დროს ქვეყნის მმართველ კოალიციაში შემავალი ყველაზე დიდი პარტიაა. სწორედ ეს არის  ჩვენი პარტიის  მთავარი გამოწვევა.

ბატონებო,

ჩვენ მოგვეცა შესაძლებლობა, მონაწილეობა მივიღოთ დემოკრატიული სახელმწიფოს მშენებლობასა და განვითარებაში. სწორედ ახლა შეგვიძლია დავანახოთ ყველას, რომ ნამდვილად ვადგავართ დემოკრატიის გზას, პირველ რიგში, იმით, რომ პარტიის შიგნით დავიცავთ დემოკრატიულ ღირებულებებს  და არავითარ შემთხვევაში არ დავუშვებთ იმას, რომ ჩვენი პარტიული საქმიანობა რამენაირად გადაეჯაჭვოს ხელისუფლების საქმიანობას, გაიგივდეს ხელისუფლებასთან.

ჩვენ უნდა დავნერგოთ ეს სტანდარტი, რადგან სწორედ ამით განსხვავდება თანამედროვე დემოკრატიული სახელმწიფო სხვა ქვეყნებისაგან. ჩვენ ვალდებული ვართ, ცივილიზებული ცხოვრება დავიწყოთ.

მეგობრებო,

ახლა მინდა შემოგთავაზოთ ჩვენი პარტიის ის პლატფორმა, რომლითაც იხელმძღვანელებს პარტია და რომელიც იქნება ჩვენი მთავარი სამოქმედო გეგმა.

პარტია ,,ქართული ოცნება - დემოკრატიული საქართველო“ იზიარებს თანამედროვე მსოფლიოს პროგრესული იდეოლოგიის ძირითად პრინციპებს და ეფუძნება სოციალური სამართლიანობის, თითოეული მოქალაქის თავისუფლების, თანასწორობის, მათთვის თანაბარი შესაძლებლობების არსებობის, საზოგადოებრივი და საერთაშორისო სოლიდარობის  ღირებულებებს.

პარტიის მიზანია საქართველოში სოციალურად ორიენტირებული, სამართლებრივი სახელმწიფოს მშენებლობა, რომლის მამოძრავებელი იქნება ძლიერი საშუალო ფენა და ორგანიზებული სამოქალაქო საზოგადოება.

პარტია აღიარებს საბაზრო ეკონომიკის მთავარ პრინციპებს, რაც ნიშნავს კერძო საკუთრების ხელშეუხებლობას და ამავდროულად უშვებს სახელმწიფო საკუთრებას იქ, სადაც ეს აუცილებელია. პარტია ასევე აღიარებს კონკურენციაზე დამოკიდებული ანუ საბაზრო ეკონომიკის პრინციპებზე დამყარებული სახელმწიფოს იდეას, რომლის ძირითადი მიზანია ეროვნული კეთილდღეობის სტრატეგიის შემუშავება და ცხოვრებაში გატარება.

პარტია მიიჩნევს, რომ  ადამიანის უფლებების განუხრელი დაცვა, მათ შორის, ნებისმიერი უმცირესობის უფლებების დაცვის კუთხით, საზოგადოებრივი აქტიურობისა და ჩართულობის ხელშეწყობა, მისი პასუხისმგებლობისა და მატერიალური დამოუკიდებლობის ამაღლება  არის სამოქალაქო საზოგადოებისაკენ მიმავალი სწორი გზა.

პარტიის უმთავრესი მიზანია სოციალური კეთილდღეობის სახელმწიფოს შექმნა, საზოგადოების საჯარო განათლება, მოქალაქეთა შორის შემოსავლების სოციალური გადანაწილება და დახმარებების გაცემა ყველაზე ღარიბებისათვის.

პარტია ქვეყნის საგარეო ურთიერთობების კურსს განსაზღვრავს ქვეყნის კონსტიტუციის სრული დაცვით და საქართველოს საშინაო ინტერესებიდან გამოდინარე. პარტიის მთავარი ამოცანაა საქართველოს დამოუკიდებლობისა და სუვერენიტეტის დაცვა და მშვიდობიანი გზით ქვეყნის ტერიტორიული მთლიანობის აღდგენა.

ქვეყანაში დემოკრატიული ინსტიტუტების გაძლიერება სახელმწიფო უშიშროების მთავარი წინაპირობაა. ეს ხელს უწყობს როგორც საგარეო-ეკონომიკური ურთიერთობების განვითარებას და პირდაპირი უცხოური ინვესტიციების მოცულობის ზრდას, ისე კონფლიქტების მშვიდობიანად მოგვარებას. ამ მიმართულებებით სახელმწიფო პოლიტიკის წარმატებამ აფხაზი და ოსი ძმები უნდა დაარწმუნოს ერთიან სახელმწიფოში ცხოვრების უპირატესობაში.

პარტიის პოლიტიკური არჩევანია საქართველოს ევროპული და ევროატლანტიკური ინტეგრაცია, რაც აუცილებლად მიაჩნია ეროვნული უსაფრთხოების უზრუნველყოფისათვის.

ევროპული და ევროატლანტიკური ინტეგრაციის წარმატების ძირითადი წინაპირობებია დემოკრატიული ღირებულებების უპირობო დანერგვა და დემოკრატიული ინსტიტუტების შექმნა.

საერთაშორისო ძალისხმევაში მონაწილეობას, კერძოდ, საერთაშორისო სამხედრო ოპერაციებში წვლილის შეტანას პარტია განიხილავს როგორც ეროვნული ინტერესების დაცვის ერთ-ერთ მნიშვნელოვან კომპონენტს.

საქართველოსა და ევროკავშირს შორის ასოცირების ხელშეკრულების გაფორმება უმნიშვნელოვანესი საგარეო პოლიტიკური ამოცანაა.

პარტია მიიჩნევს, რომ საქართველო ევროპული ქვეყანაა და მისი ადგილი არის იქ, სადაც ტრადიციული ევროპული დემოკრატიები თანაარსებობენ. პარტიის სტრატეგიული მიზანია, საქართველო გახდეს ევროპის კავშირის სრულუფლებიანი წევრი.

პარტია მიისწრაფვის თავის მთავარ მოკავშირესთან - ამერიკის შეერთებულ შტატებთან ურთიერთობების გაღრმავებისკენ და საქართველო-ამერიკას შორის დადებულ ქარტიას განიხილავს, როგორც ქვეყნის ვალდებულებას, პირველ რიგში, საკუთარი საზოგადოების წინაშე.

პარტია მიისწრაფვის საქართველოსა და რუსეთს შორის დაწყებული დიალოგის გაღრმავებისკენ, რომლის მიზანიც იქნება ქვეყნებს შორის არსებული კრიზისის დაძლევის სტრატეგიის შემუშავება.

პარტია მიიჩნევს, რომ დაბალანსებული რეგიონალური პოლიტიკით საქართველომ უნდა შეიძინოს კავკასიური ინტერესების გამაერთიანებლის, ეკონომიკური თანამშრომლობისა და პოლიტიკური მოლაპარაკებების ხელშემწყობის ფუნქცია.

პარტია, ასევე, მიისწრაფვის ევროპასა და მსოფლიოში მოქმედ პროგრესულ, დემოკრატიულ, სოციალ-დემოკრატიულ, სოციალისტურ, ლეიბორისტულ ძალებთან მჭიდრო თანამშრომლობისკენ.

პარტია უერთდება საერთაშორისო სამოქალაქო საზოგადოების შემადგენელი მოძრაობებისა და ჯგუფების მისწრაფებასა და ძალისხმევას, რომ შეიქმნას ისეთი მომავალი, სადაც დაცული იქნება მშვიდობა მთელ მსოფლიოში, სამართლიანობა, თანასწორობა და მდგრადობა.

სწორედ ამ მიზნით, პარტიამ უნდა ითანამშრომლოს ევროპისა და მსოფლიოს პროგრესულ პოლიტიკურ ძალებთან, აქტიურად ჩაერთოს სოციალური სამართლიანობის, თითოეული მოქალაქის  თავისუფლების, თანასწორობისა და თანაბარი შესაძლებლობების არსებობისთვის ბრძოლაში.

აი, ეს გახლავთ ჩვენი პარტიის ძირითადი ღირებულებები და მიმართულებები, რომელთა ერთგულიც ვიქნებით ჩვენს საქმიანობაში.

გარწმუნებთ, ,,ქართული ოცნება - დემოკრატიული საქართველო“ იქნება პარტია, რომელიც ღირსეულად წარმართავს თავის საქმიანობას, ჯანსაღ პოლიტიკურ გარემოში ღირსეულ კონკურენციას გაუწევს სხვა პოლიტიკურ პარტიებს და თვალსაჩინო ადგილს დაიმკვიდრებს ქართულ პოლიტიკურ ცხოვრებაში.

გმადლობთ ყურადღებისათვის.

ახლა, რეგლამენტის მიხედვით, მინდა წარმოგიდგინოთ 12-კაციანი პოლიტსაბჭოს შემდგენლობა. პოლიტსაბჭოს წევრებად დასახელებული არიან:

1. კახი კალაძე

2. ნოდარ ხადური

3. ირინა იმერლიშვილი

4. გიორგი ვოლსკი

5. მანანა კობახიძე

6. ეკა ბესელია

7. თამაზ ავდალიანი

8. დავით საგანელიძე

9. ირაკლი ტრიპოლსკი

10. თემურ ჭკუასელი

11. ირაკლი სესიაშვილი

12. არმაზ ახვლედიანი