სამართალი
იზრდება თვითმმართველი ქალაქების რაოდენობა - საქართველოს პარლამენტის ბიურომ თვითმმართველობის კოდექსი დაარეგისტრირა
საქართველო, 13 ნოემბერი, საქინფორმი. საქართველოს პარლამენტის ბიურომ საქართველოს თვითმმართველობის კოდექსის პროექტი სხდომაზე დაარეგისტრირა. დოკუმენტის საკომიტეტო განხილვის პროცედურები პარლამენტში უახლოეს მომავალში დაიწყება.
თვითმმართველობის ახალი კოდექსი თვითმმართველობის არსებულ მანკიერ სისტემას ევროპული, საზოგადოებაზე ორიენტირებული თვითმმართველობის სისტემით ცვლის.
პროექტის მიხედვით, იზრდება თვითმმართველი ქალაქების რაოდენობა და ნაცვლად დღეს არსებული 5 თვითმმართველი ქალაქისა (თბილისი, რუსთავი, ქუთაისი, ფოთი, ბათუმი), ეს სტატუსი მიენიჭება იმ ქალაქებსაც, სადაც მოსახლეობის რაოდენობა 15 ათასზე მეტია. თვითმმართველი ქალაქების მიმდებარე სოფლებისგან ჩამოყალიბდება თემები და მათ ბაზაზე ჩამოყალიბდება მუნიციპალიტეტები; თვითმმართველი ერთეულების - ქალაქებისა და მუნიციპალიტეტების მმართველი რგოლები იქნება არჩევითი.
ახალი კოდექსის მიხედვით, გუბერნატორის ინსტიტუტის პარალელურად, შეიქმნება კოლეგიალური ორგანო, რომელშიც წარმოდგენილი იქნებიან საკრებულოს წევრები. ეს ორგანო ჩართული იქნება გადაწყვეტილებების მიღების პროცესში.საქართველოს მთავრობამ თვითმმართველობის კოდექსი ოქტომბრის ბოლოს დაამტკიცა.
