სამართალი
"ახალგაზრდა ადვოკატები“: „პრეზიდენტი მიხეილ სააკაშვილი არღვევს საქართველოს კონსტიტუციას და დისკრედიტაციას უკეთებს მოქალაქეობის ინსტიტუტს“
საქართველო, 8 ნოემბერი, საქინფორმი. ორგანიზაცია „ახალგაზრდა ადვოკატები“ ეხმაურება საქართველოს პრეზიდენტის მიხეილ სააკაშვილის გადაწყვეტილებას, რომლის მიხედვით პრეზიდენტი საქართველოს მოქალაქეობის მიღების მსურველებს ორმაგ მოქალაქეობას გამარტივებული წესით მიანიჭებს.
ორგანიზაციის განცხადებით, მოქალაქეობის მინიჭების საკითხს კონსტიტუციის მე-12 და საქართველოს მოქალაქეობის შესახებ ორგანული კანონის 1-ლი მუხლის მე-2 პუნქტი არეგულირებს, რომელთა მიხედვითაც, პრეზიდენტის მიერ საქართველოს მოქალაქეობა შეიძლება მიენიჭოს უცხო ქვეყნის მოქალაქეს, რომელსაც საქართველოს წინაშე აქვს განსაკუთრებული დამსახურება, ან მისთვის საქართველოს მოქალაქეობის მინიჭება გამომდინარეობს საქართველოს ინტერესებიდან. პრეზიდენტის ინიციატივით, ორმაგი მოქალაქეობა 10 სექტემბრისა და 21 ოქტომბრის ბრძანებულებებით 2023 კაცს მიენიჭა. ამ ადამიანებიდან კი საეჭვოა ის ფაქტი, რომ ყოველ მათგანს საქართველოს წინაშე განსაკუთრებული დამსახურება ჰქონდეს. ის არგუმენტი კი, რომ ამ ნაბიჯით ინვესტორების დაინტერესება გაიზრდება, სუსტია, რადგან ნებისმიერ დაინტერესებულ უცხოელს, საქართველოს კანონმდებლობის შესაბამისად, შეუძლია საქართველოს ტერიტორიაზე აწარმოოს ბიზნესი. ერთადერთი შეზღუდვა რაც მათ მიმართ იარსებებს, არის სასოფლო-სამეურნეო დანიშნულების მიწების საკუთრებით შესყიდვის შეზღუდვა. ამ გარემოებებიდან გამომდინარე, „ახალგაზრდა ადვოკატები“ მივიჩნევთ, რომ შეგნებულად ხდება მოსახლეობის შეცდომაში შეყვანა.
ორგანიზაცია ყოველივე ზემოაღნიშნულიდან გამომდინარე მიიჩნევს, რომ ინიციატივის განხორციელება არ არის მიზანშეწონილი და მოუწოდებს მიხეილ სააკაშვილს, არ განახორციელოს პოლიტიკურად მოტივირებული გადაწყვეტილება, პატივი სცეს საქართველოს კონსტიტუციასა და მოქალაქეობის ინსტიტუტს და შეაჩეროს უფლების ბოროტად გამოყენება, რომელიც არ პასუხობს არც საზოგადოების ინტერესებს და არც კანონით დადგენილ წესებს.
