საქართველო, 4 ნოემბერი, საქინფორმი. გუშინ, 3 ნოემბერს სვეტიცხოველში უფლისწული გიორგი მონათლეს. უფლისწულს 4 ნათლია ჰყავს – ბიზნესმენი ლევან ვასაძე, მიხეილ ახვლედიანი და უფლისწულის ბიძები – გურამ და ირაკლი ბაგრატიონები. ისინი უფლისწულის მამის, დავითის ძმები არიან.
ნათლობის ცერემონია სრულიად საქართველოს პათოკოლიკოს-პატრიარქმა, უწმინდესმა და უნეტარესმა ილია მეორემ სასულიერო პირებთან ერთად აღასრულა. ნათლობის დაწყებამდე კი სვეტიცხოველში კიდევ ერთი მღვდელმთავარი ეკურთხა. კერძოდ, კათოლიკოს-პატრიარქმა იღუმენი დამიანე სამთავისისა და კასპის ეპარქიის ეპისკოპოსად აკურთხა. იგი მესამე მღვდელმთავარია, რომელიც წმინდა სინოდის განჩინებით ეკურთხა.
„მეუფე დამიანე, თქვენ მიიღეთ უდიდესი მადლი მღვდელთმთავრისა და შევთხოვ უფალს, ეს მადლი იყოს თქვენთან და კი არ დაგაკლდეთ, მოგემატოთ", - მიმართა პატრიარქმა ქადაგებისას.

გუშინვე საქართველოს შეიარაღებული ძალების ოფიცრები სრულიად საქართველოს კათოლიკოს-პატრიარქს, ილია II-ს სვეტიცხოვლის საკათედრო ტაძარში ესტუმრნენ. საქართველოს შეიარაღებული ძალების III ქვეითი ბრიგადის მეთაურმა, ვიცე-პოლკოვნიკმა მალხაზ მერლანმა და წვრთნებისა და სამხედრო განათლების სარდლის მოადგილემ, პოლკოვნიკმა ალექსანდრე კიკნაძემ უწმინდესსა და უნეტარესს, ISAF-ის მისიაში მონაწილე ქართული კონტინგენტის სახელით,  სიმბოლური საჩუქარი - საქართველოს სახელწმიფო დროშა გადასცეს.