აქტუალური
ცესკო: 12 საათისთვის ამომრჩეველთა აქტივობამ 17.15% შეადგინა
საქართველო, 27 ოქტომბერი, საქინფორმი. ამომრჩეველთა აქტივობა 12 საათისთვის 17.15%–ს შეადგენს, - ამის შესახებ ცესკოს სპიკერმა ეკა აზარაშვილმა განაცხადა. მისი ინფორმაციით, არჩევნებში მონაწილეობა უკვე 606 710 ამომრჩეველმა მიიღო. პროცენტულად ყველაზე მაღალი აქტივობა დაფიქსირდა რაჭა-ლეჩხუმში - 29% და გურიაში - 24%. ყველაზე დაბალი აქტივობა - 14.4% კი - ქვემო ქართლში.აზარაშვილის თქმით, საზღვარგარეთ, ათენში არის ყველაზე მეტი უბანი, სადაც რეგისტრაციიდან მოხსნილმა მოქალაქეებმა ვერ მოახერხეს ხმის მიცემა, რადგანაც შესაბამის დროს არ გაიარეს რეგისტრაცია.
"არჩევნები ზოგადად მშვიდ ვითარებაში მიმდინარეობს. განსაკუთრებული ექსცესების გარეშე, პროცედურული ხარვეზები, რაც დაფიქსირდა, ადგილზევე აღმოიფხვრა. კრწანისის მე-5 უბანზე არაუფლებამოსილი პირები იმყოფებოდნენ და კომისიამ მათ დაატოვებინა შენობა. კრწანისის მე-12 უბანზე სამმა ადამიანმა პირადობის მოწმობა უფლებამოსილი პირის ხელმოწერის გარეშე წარადგინა, რის გამოც მათ ხმის მიცემა ვეღარ შეძლეს. ახალციხის 35-ე უბანთან მოხდა შელაპარაკება, მაგრამ შელაპარაკება არ მომხდარა უბანზე", - განაცხადა აზარაშვილმა.
არჩევნების კურიოზი: ერთ-ერთმა ამომრჩეველმა, რომელმაც მიხეილ სააკაშვილის გვარი კანდიდატთა სიაში ვერ ნახა, აღშფოთებულმა კომისიის წევრებს "შეცდომის გამოსწორება" მოსთხოვა.
