სამართალი
შსს მოუწოდებს ცხინვალის რეგიონის დე ფაქტო მთავრობას - არ მოუსპოს ოკუპაციის ხაზის მიღმა დარჩენილ მოსახლეობას საპრეზიდენტო არჩევნებში მონაწილეობის მიღების საშუალება
საქართველო, 27 ოქტომბერი, საქინფორმი. შსს შეშფოთებას გამოთქვამს ცხინვალის დე ფაქტო მთავრობის მიერ 27 ოქტომბერს დაგეგმილი საპრეზიდენტო არჩევნებისთვის საქართველოს ცენტრალური ხელისუფლების მიერ კონტროლირებად ტერიტორიაზე, საოკუპაციო ხაზზე საქართველოს მოქალაქეების გადაადგილების შეზღუდვასთან დაკავშირებით.
შსს მკაცრად გმობს დე ფაქტო ცხინვალის რეჟიმის ზემოთ აღნიშნულ გადაწყვეტილებას, რადგან ეს არის ადგილობრივი მოსახლეობისთვის თავისუფალი გადაადგილების, არჩევანის გაკეთების პირდაპირი შეზღუდვა და, შესაბამისად, ადამიანის უფლებების და თავისუფლებების დარღვევა.
შსს მოუწოდებს ოკუპირებული ცხინვალის რეგიონის დე ფაქტო მთავრობას, გადახედოს მათ მიერ მიღებულ უკანონო გადაწყვეტილებას და არ მოუსპოს ოკუპაციის ხაზის მიღმა დარჩენილ საქართველოს მოსახლეობას დაგეგმილ საპრეზიდენტო არჩევნებში მონაწილეობის მიღების საშუალება.
