უცხოეთი
ევროკავშირთან საქართველოს ასოცირების ხელშეკრულების პარაფირების საკითხს ნოემბერში განიხილავენ

soglashenieსაქართველო, 24 ოქტომბერი, საქინფორმი. ევროკავშირთან საქართველოს ასოცირების  ხელშეკრულების პარაფირების შემთხვევაში საქართველო ისეთ ქვეყნებს გაუტოლდება, როგორიცაა ნორვეგია და შვეიცარია, - განაცხადა პოლონეთის საგარეო უწყების ხელმძღვანელმა რადოსლავ სიკორსკიმ 2013 წლის 23 ოქტომბერს თბილისში საქართველოს პრემიერ-მინისტრ ბიძინა ივანიშვილთან შეხვედრის შემდეგ.

სიკორსკი და შვედეთის საგარეო საქმეთა მინისტრი კარლ ბილდტი საქართველოში იმ ტურნეს ფარგლებში ჩამოვიდნენ, რომელიც მოლდოვასა და უკრაინაში სტუმრობასაც ითვალისწინებს „აღმოსავლეთ პარტნიორობის“ სამიტის წინ ვილნიუსში (28-29 ნოემბერი). სამიტზე ევროკავშირთან საქართველოს ასოცირების ხელშეკრულების პარაფირება უნდა მოხდეს.

„თუ ეს მოხდა, ერთი წლის შემდეგ ხელი მოეწერება დოკუმენტს. ეს კი იმის დასტური იქნება, რომ თქვენ ევროპულ კანონებს ამკვიდრებთ და ევროკავშირთან მიმართებაში ნორვეგიისა და შვეიცარიის, ასევე სხვა ქვეყნების მსგავს ქვეყნად იქცევით (ეს ქვეყნები ევროკავშირის წევრები არ არიან)“, - განაცხადა სიკორსკიმ.