საქართველო, 3 ოქტომბერი, საქინფორმი. არასამთავრობო ორგანიზაციების: „საერთაშორისო გამჭვირვალობა – საქართველოსა“ და „სამართლიანი არჩევნებისა და დემოკრატიის საერთაშორისო საზოგადოების“ (ISFED) ერთობლივი განცხადებით, „მიუღებელია, პრემიერ-მინისტრი ჟურნალისტებს მათ მიერ გამოქვეყნებული მასალების გამო პასუხს სთხოვდეს“.
განცხადების თანახმად, პრემიერ-მინისტრმა ბიძინა ივანიშვილმა საკუთარ რეზიდენციაში ქართული ტელევიზიების წარმომადგენლებთან გამართული შეხვედრისას დამსწრე ჟურნალისტებს უხეში შენიშვნები მისცა და ქართველი ჟურნალისტების პროფესიონალიზმის დონე გააკრიტიკა.

„პრემიერ-მინისტრს მომზადებული ჰქონდა ამონარიდები იმ სტატიებიდან და სატელევიზიო გადაცემებიდან, რომლებიც პირადად მისთვის იყო მიუღებელი. მან რამდენჯერმე მოახდინა ციტირება აღნიშნული მასალებიდან და მისთვის მიუღებელი ინფორმაციის გავრცელებისათვის თითოეულ დამსწრე ჟურნალისტს ახნა-განმარტება მოსთხოვა. გარდა ამისა, ივანიშვილმა მედიის წარმომადგენლებს რამდენიმე უნარ-ჩვევა დაუწუნა, მათ შორის, შეკითხვის დასმის, არგუმენტების მოყვანისა და რესპონდენტთა შერჩევის“, – ნათქვამია განცხადებაში.

ამასთან, არასამთავრობოების შეფასებით, ბიძინა ივანიშვილის გუშინდელი ტონი და მისი ინსტრუქციები კითხვების ფორმულირების თაობაზე შეიძლება შეფასდეს, როგორც ღია ჩარევა მედიის საქმიანობაში.