საქართველო, 2 ოქტომბერი, საქინფორმი. აშშ-ის მთავრობამ გუშინ ოფიციალურად გამოაცხადა ფედერალური სტრუქტურების მიერ სამუშაოს შეწყვეტის შესახებ. ეს მას შემდეგ მოხდა, რაც კონგრესში რესპუბლიკელები და დემოკრატები სახელმწიფო ვალის ლიმიტის გაზრდაზე ვერ შეთანხმდნენ. ოპონენტებთან მოლაპარაკების წარმოებაზე უარი განაცხადა პრეზიდენტმა ბარაქ ობამამაც. გაჭიანურებული საბიუჯეტო დაპისისპირება ამერიკის ეკონომიკას დღეში 300 მლნ დოლარის დაკარგვით ემუქრება. თუმცა თეთრ სახლში დარწმუნებული არიან, რომ ეს რესპუბლიკელებს კომპრომისზე წასვლას აიძულებს. ვაშინგტონში გუშინ  მუზეუმები და ნაციონალური პარკები დაიხურა. დილის 8 საათზე პოლიციამ რკინის ბარიერებით გადაღობა ყველა მისასვლელი ლინკოლნის მემორიალთან, ხოლო სახელმწიფო გალერეებისა და საგამოფენო დარბაზების კარებზე გამოიკრა განცხადებები „გაურკვეველი პერიოდით“ მუშაობის შეწყვეტის შესახებ.

წინა დღეს თეთრი სახლის საბიუჯეტო ოფისმა ფედერალური უწყებების თანამშრომლები გააფრთხილა, რომ ყველა სახელმწიფო დაწესებულება აშშ-ში საგანგებო რეჟიმზე გადადის. იძულებით შვებულებაში გავიდა ნასას სპეციალისტთა 90 პროცენტი, ენერგეტიკის სამინისტროს მუშაკთა თითქმის 70% და თავდაცვის სამინისტროს სამოქალაქო მოსამსახურეთა 50%.

სულ საბიუჯეტო კოლაფსი, რომელიც რესპუბლიკელებსა და დემოკრატებს შორის სახელმწიფო ვალის ლიმიტის ზრდასთან დაკავშირებულმა უთანხმოებამ გამოიწვია, 3 მლნ კაცზე მეტს შეეხება. თუმცა, კონგრესმა მოასწრო კანონის მიღება, რომლის თანახმადაც სამხედრო მოსამსახურეებს ფულადი ანაზღაურება არ შეუწყდებათ.

რესპუბლიკელები კვლავაც იჟინებენ, რომ ფედერალური ბიუჯეტის პროექტი მომავალ საფინანსო წელს მხოლოდ ჯანდაცვის რეფორმის რეალიზაციის გადავადების სანაცვლოდ შეიძლება დამტკიცდეს. სენატი კი, სადაც უმრავლესობას დემოკატები შეადგენენ, ამის სასტიკი წინააღმდეგია.