აქტუალური
მიხეილ სააკაშვილი: „ვინ თქვა რომ ვერ ავალთო?!“
საქართველო, 10 სექტემბერი, საქინფორმი. „გზის სირთულის მიუხედავად დასახულ მიზანს მაინც მივაღწიეთ! მყინვარწვერი რუსეთის ოპოზიციის ერთ-ერთ ლიდერ ანდრეი ილარიონოვთან ერთად დავლაშქრე. მთის ბოლო მონაკვეთზე ალპინისტური თოკებითა და სხვა სპეციალური ტექნიკის გამოყენებით ავედით. თოკში ასევე უკრაინისა და ირანის მოქალაქეები ჩაებნენ, რომლებიც გზაში შემოგვხვდნენ. სწორედ ამ ინტერნაციონალური ერთობით 5047 მეტრზე, სიმბოლურად, საქართველოს დროშა აღვმართეთ.
გზაში რამდენიმე უკან მობრუნებული ჯგუფი შეგვხვდა, რომელიც ჩვენც გვირჩევდა მსვლელობის შეწყვეტას, რადგან მათ, მწვერვალთან სიახლოვეში ძლიერი ქარის გამო, ასვლა შეუძლებლად მიაჩნდათ, მაგრამ მეორედაც უკან მობრუნება ჩვენ ნამდვილად არ გვხიბლავდა. იქ, მყინვარის თავზე განსაკუთრებული სიმძაფრით ხვდები, თუ რა ლამაზი და განსაკუთრებულია ჩვენი საქართველო.
მჯერა, რომ არ არსებობს მიზანი, რომელსაც ერთობით ვერ მივაღწევთ! საქართველოს მომავალი მყინვარწვერივით ნათელია! დაბრკოლებების მიუხედავად, ჩვენ ყველა მწვერვალს დავიპყრობთ!“ - წერს „ფეისბუქის“ საკუთარ გვერდზე საქართველოს პრეზიდენტი მიხეილ სააკაშვილი.
