საქართველო, 15 აგვისტო, საქინფორმი. საქართველოს ცენტრალური საარჩევნო კომისიის თავმჯდომარის, ზურაბ ხარატიშვილის გადადგომა პრეზიდენტის მხრიდან განხორციელებული შესაძლო ზეწოლის შედეგია და 2013 წლის საპრეზიდენტო, 2014 წლის ადგილობრივი თვითმმართველობისა და 2016 წლის პარლამენტის არჩევნების შემდგომი შედეგების პროგნოზირებაზე მიანიშნებს. “ახალგაზრდა ადვოკატთა“ შეფასებით, ზურაბ ხარატიშვილმა გადადგომით პოლიტიკური გადაწყვეტილება მიიღო, რომელმაც, შესაძლოა, 27 ოქტომბრის საპრეზიდენტო არჩევნების გამჭვირვალობასა და დემოკრატიულობაზე უარყოფითად იმოქმედოს - ამის შესახებ ბრიფინგზე არჩილ კაიკაციშვილმა განაცხადა.

გადადგომის გადაწყვეტილება პრობლემების წინაშე აყენებს ცენტრალური საარჩევნო კომისიის ეფექტიან მუშაობას და ერთიანობაში შესაძლებელია გამოიწვიოს საპრეზიდენტო არჩევნების დისკრედიტაცია. ამიტომაც საპრეზიდენტო არჩევნებამდე მიღებული გადაწყვეტილება მხოლოდ საპრეზიდენტო პარტიის პოლიტიკური ინტერესების გამომხატველია, რადგანაც უცნობია, ვის წარადგენს პრეზიდენტი ცესკოს ახალ თავმჯდომარედ, რამდენად მისაღები იქნება დასახელებული კანდიდატები საზოგადოებისთვის, ვინ აირჩევს თავმჯდომარეს – საარჩევნო კომისია თუ პარლამენტი, რამდენად იქნება შენარჩუნებული საარჩევნო სტაბილურობა და საარჩევნო ადმინისტრაციის მიუკერძოებლობა.