საქართველო, 8 აგვისტო, საქინფორმი. 2013 წლის 6 აგვისტოს, საღამოს – 22:00–ზე, ქართული ტელეკომპანია Rustavi 2–ის ეთერში გავიდა 46–წუთიანი ექსკლუზიური ინტერვიუ, რომელიც 2008 წლის 8 აგვისტოს სამხრეთ ოსეთში ომის 5 წლისთავის წინ მისცა რუსეთის ფედერაციის მთავრობის თავმჯდომარემ დიმიტრი მედვედევმა (ნინო შუბლაძის საავტორო გადაცემა „პოზიციას“ ტელეარხ „Rustavi 2“–ზე).

გუშინ, 7 აგვისტოს, საქინფორმმა ქართულ და რუსულ ენებზე გამოაქვეყნა მედვედევის ინტერვიუ უმნიშვნელო კუპიურებით, მაგრამ ამასთან თავისი მკითხველის ყურადღება მიაქცია მედვედევის არაინფორმირებულობას ტელეკომპანია „Rustavi 2“–ის თაობაზე, რომელიც არა მარტო პრეზიდენტ სააკაშვილს ეკუთვნის, არამედ „ნაციონალური მოძრაობის“ მთავარი პროპაგანდისტული მანქანაა 2003 წელს მისი დახმარებით მოწყობილი „ვარდების გადატრიალებიდან“ დღემდე.

საქინფორმმა გუშინ ხაზი გაუსვა, რომ მედვედევის აპარატის თანამშრომლებს მისთვის ამის შესახებ რომ მოეხსენებინათ, ის, ალბათ, საქართველოში მთავარ ანტირუსულ რუპორ „Rustavi 2“–ს აღარ უწოდებდა არხს, რომელიც „ავტორიტეტით და საქართველოს მცხოვრებთა სიყვარულითა და პატივისცემითაც კი სარგებლობს“ და არ მისცემდა მას ინტერვიუს, რომელიც, ეჭვგარეშეა, მის წინააღმდეგ იქნება გამოყენებული.

ასეც მოხდა: გუშინვე, 2013 წლის 7 აგვისტოს, საღამოს – 22:00–ზე, ანუ ზუსტად 24 საათში მედვედევის ინტერვიუს შემდეგ, „Rustavi 2“–ის ეთერში გავიდა ინტერვიუ მის მფლობელთან – საქართველოს პრეზიდენტ მიხეილ სააკაშვილთან, რომელიც მთლიანად მიეძღვნა მედვედევის ზემოხსენებული ინტერვიუს გარჩევას და კრიტიკას მისი, სააკაშვილისეული გაგებით: 70 წუთის განმავლობაში სააკაშვილი ოსტატურად აფრქვევდა ეთერში სასტიკ ტყუილებს, გაზავებულს ფაქტებითა და გარემოებებით, რომლებსაც მართლაც ჰქონდა ადგილი წარსულში, რითაც მოსახლეობის გარკვეულ ნაწილს „დიდი რუსეთის მიერ დამცირებული საქართველოს პატარა პრეზიდენტის მიერ პირველად გამჟღავნებული სენსაციური“ ინფორმაციის უტყუარობის შთაბეჭდილება შეექმნა.

მაგალითად, ტელეკორესპონდენტის კითხვაზე, - რამდენადაც ვიცი, კონდოლიზა რაისიც გაფრთხილებდათ, რომ ყველაფერი უნდა გექნათ იმისთვის, რომ არ აღმოჩენილიყავით ჩათრეული ომში... - სააკაშვილმა უპასუხა:

„კონდოლიზა რაისს არ სჯეროდა, რომ ეს მოხდებოდა. მისი საყვარელი ფრაზა იყო: ვიცნობ რუსეთს, ისინი ამას არ გააკეთებენ! ასე რომ, ჩვენ ვაფრთხილებდით, ვყვიროდით, ვღმუოდით, რა ვიცი, ნატოს ვეუბნებოდით, რომ მოიწვიე სასწრაფოდ საგანგებო სხდომა და ნატოს გენერალურ მდივანს დავურეკე წინა დღეებში... მერკელი იყო დასასვენებლად წასული კუნძულებზე და დანარჩენები პეკინში. იდეალური სიტუაცია იყო რუსებისთვის - ვერავის ვეღარ ვუკავშირდებოდი.

ჩვენ რომ არ შემოგვებრუნებინა ხელი, ისინი შემოვიდოდნენ. 50 სამხედრო ჟურნალისტი ჩამოიყვანეს ივლისის ბოლოს. გაიყვანეს მოსახლეობა. იმიტომ კი არ გაიყვანეს, რომ უყვარდათ ოსები, იმიტომ, რომ ვიწრო გზაა როკის გვირაბის და როგორც კი მერე იქიდან დაიწყებოდა სროლები, ეს მოსახლეობა მოადგებოდა ფეხებში.

ახლა დანამდვილებით არის დადგენილი - პირველი ცეცხლი სამშვიდობოებს გაუხსნა გრუ-ს სპეცრაზმმა. მედვედევი ისტერიულად რომ იმეორებს, სააკაშვილმა მოკლა 3 ათასი კაციო, ამოიღონ ის ჩანაწერები, ურცხვად, ისტერიულად იმეორებს, 3 ათასი კაცი მოკლა, არ შევიდეთო? აღმოჩნდა, რომ 100 კაცია, ამოიღეს სია და პრაქტიკულად ყველა იყვნენ მებრძოლები.

- კიდევ ერთი ბრალდება სწორედ მებრძოლებთან დაკავშირებით. მან აგრეთვე თქვა, რომ ქართველი სამშვიდობოები ცხრილავდნენ რუს სამშვიდობოებს, რაზეც თქვა, რომ ეს საერთოდ გაუგონარია...

- გრუს-ს სპეცრაზმმა გაუხსნა ცეცხლი რუს სამშვიდობოებს, იმისათვის, რომ ჰქონოდათ საბაბი. რუსეთის პოლიტიკა რა იყო – ლობისტებს აძლევდნენ შეკეთას, რომ ჩვენ კი არა ვართ კარგი ხალხი, მაგრამ საქართველოც ხომ ცუდი ხალხია. ჩვენი დღევანდელი მთავრობის წარმომადგენელი იგივეს იმეორებს: ორივე მხარე დამნაშავეა! ეს არის რუსული პროპაგანდა.