სამართალი
მარიამ კოჩალიძის მკვლელობაში ეჭვმიტანილს პატიმრობა შეეფარდა
საქართველო, 26 ივლისი, საქინფორმი. ბათუმის საქალაქო სასამართლოს მოსამართლე ხვიჩა კიკილაშვილმა გუშინ, გვიან ღამით, მარიამ კოჩალიძის მკვლელობაში ეჭვმიტანილ მოჰამადამინ რუინთანს წინასწარი პატიმრობა დაუსწრებლად შეუფარდა. ირანის მოქალაქეს ბრალი განსაკუთრებული სისასტიკითა და ანგარებით ჩადენილ განზრახ მკვლელობაში ედება.
შსს-ს ცნობით, 22 ივლისს ბათუმში მომხდარ 16 წლის მარიამ კოჩალიძის მკვლელობაში სავარაუდო დამნაშავე 1985 წელს დაბადებული ირანის მოქალაქე მოჰამადამინ რუინთანია, რომელიც საქართველოში სარფის სასაზღვრო-გამშვები პუნქტიდან 23 ივნისს შემოვიდა და 22 ივლისს, 19:22 საათზე, საქართველოს ტერიტორია ასევე სარფის სასაზღვრო-გამშვები პუნქტის გავლით დატოვა.
აღნიშნული პირის დასაკავებლად შინაგან საქმეთა სამინისტრო თურქ კოლეგებთან მოლაპარაკებას აწარმოებს.
