საქართველო, 3 ივნისი, საქინფორმი. ოპოზიციურმა პარტია “თავისუფალმა საქართველომ“ (თავმჯდომარე - კახა კუკავა), ქართული საზოგადოებრიობის წარმომადგენლებთან ერთად, საქართველოში თურქეთის ელჩის ლევენტ მურატ ბურჰანის სახელზე მიმართვა გაგზავნა, რომელშიც გამოთქმულია იმედი, რომ თურქი უფროსკლასელებისთვის შედგენილ ისტორიის სახელმძღვანელოში (რომლის შესახებ 17 აპრილს საქინფორმი იუწყებოდა) გაპარული შეცდომა გასწორდება. თურქეთის განათლების სამინისტროს მიერ დამოწმებულ ისტორიის სახელმძღვანელოში ჩამოთვლილია ქვეყნები, რომლებმაც 1918 წელს თურქეთის ტერიტორიები მიითვისეს, მათ შორის - საქართველო, რომელმაც 1918 წელს, თურქი ისტორიკოსების მტკიცებით, თურქეთის ტერიტორიის - ქალაქ ბათუმის ოკუპაცია მოახდინა.

მიმართვის ავტორები შეახსენებენ სახელმძღვანელოს შემდგენლებს, რომ ისტორიული წყაროები აჭარას (რომლის ადმინისტრაციული ცენტრი გახლავთ ბათუმი) ჯერ კიდევ მე-8 საუკუნეში მიაკუთვნებდნენ ბაგრატიონთა სამფლობელოს, მე-11 საუკუნიდან ის ერთიანი ფეოდალური ქართული სახელმწიფოს შემადგენლობაში შედიოდა, მე-16 საუკუნეში აჭარა ოსმალეთის იმპერიამ დაიპყრო, მაგრამ 1878 წლის ბერლინის კონგრესის გადაწყვეტილების საფუძველზე აჭარა სხვა ისტორიულ ქართულ მიწებთან ერთად საქართველოს შემადგენლობაში შევიდა. 1921 წლის 13 ოქტომბრის ყარსის ხელშეკრულებით, აჭარა საქართველოს შემადგენლობაში დარჩა და მას ავტონომიური რესპუბლიკის სტატუსი მიენიჭა.