საქართველო, 26 აპრილი, საქინფორმი.  პრეზიდენტი სააკაშვილი მოუწოდებს პრემიერ ბიძინა ივანიშვილს, გადახედოს გადაწყვეტილებას ბათუმის ტექნოლოგიური უნივერსიტეტის შენობაში ქალაქის მერიის განთავსების შესახებ და ამ გადაწყვეტილებას დამანგრეველსა და არაცივილიზებულს უწოდებს.

ეკონომიკის სამინისტროს განმარტებით კი, ბათუმის მერიის მხრიდან შესულია განაცხადი ამ შენობის გადაცემის თაობაზე, მაგრამ ამ ეტაპზე საბოლოო გადაწყვეტილება მიღებული არ არის, თუმცა მთავრობის წევრები არ მალავენ, რომ ეს შენობა უნივერსიტეტისთვის განკუთვნილი არ არის.

გიორგი მარგველაშვილის განცხადებით, „ეს იყო სააკაშვილის სურვილი, რომელმაც, ისევე, როგორც მისმა მრავალმა ოცნებამ, დაკარგა თავისი ფორმა, იმიტომ რომ არც იყო რეალობასთან კავშირში. კომპეტენტურმა ადამიანებმა, ქართველებმაც და უცხოელებმაც, გამოთქვეს მოსაზრება, რომ ეს ოდიოზური გადაწყვეტილება იყო... სააკაშვილივით არქიტექტურაში ალბათ არ არიან ჩახედულები, მაგრამ უფრო მეტად ესმით უნივერსიტეტი და კამპუსის კონცეფცია“.

საპარლამენტო უმცირესობას კი მიაჩნია, რომ განათლების ახალი კერის გაჩენა ახალ მთავრობას იმიტომ არ სურს, რომ ის მიხეილ სააკაშვილს უკავშირდება.

უცნობია, გადახედავს თუ არა პრემიერი აღნიშნულ გადაწყვეტილებას, შენობის ბედზე  კი ეკონომიკის სამინისტრო მომავალ კვირაში იმსჯელებს.