პოლიტიკა
სააკაშვილი ლონდონში მხარდაჭერისთვის მიფრინავს, თუ?..
საქართველო, 13 მარტი, საქინფორმი. 4 მარტის პუბლიკაციაში – „სად იყო სანდრა, პრეზიდენტი ჰალსტუხის გარეშე და შევარდნაძის მოწაფის ბოლო ოინი“ – საქინფორმის მთავარი რედაქტორი არნო ხიდირბეგიშვილი გამოთქვამს მოსაზრებას, რომ „პრეზიდენტი სააკაშვილი ემიგრაციაში წავა ლონდონში, როგორც განაწყენებული პრეზიდენტი, რომელიც ოკუპანტმა – რუსეთმა და მისმა დასმულმა პრემიერ-მინისტრმა ივანიშვილმა სამშობლოდან გააძევა“.
და აი, როგორც ჩანს, ეს ჰიპოთეზა, გარკვეულწილად, მართლდება – კომპეტენტური წყაროსგან, რომელმაც ინკოგნიტოდ დარჩენა მოისურვა, საქინფორმმა გუშინ შეიტყო, რომ საქართველოს პრეზიდენტი მიხეილ სააკაშვილი მართლაც აპირებს უახლოეს ხანებში ლონდონში გაფრენას, როგორც ინკოგნიტომ აღნიშნა, „მხარდაჭერისთვის“.
საქართველოს პრეზიდენტის ადმინისტრაციის საზოგადოებასთან ურთიერთობის სამსახურში საქინფორმს უპასუხეს, რომ დიდ ბრიტანეთში მიხეილ სააკაშვილის მოსალოდნელი ვიზიტის შესახებ ინფორმაციას არ ფლობენ, ხოლო პრეზიდენტის პრესსპიკერ მანანა მანჯგალაძესთან მობილური ტელეფონით დაკავშირება არ მოხერხდა, რადგან ის, როგორც ადმინისტრაციაში გვაცნობეს, სამსახურებრივ მივლინებაში იმყოფება.
