პოლიტიკა
უსუფაშვილი აშშ-ში ოფიციალური ვიზიტით იმყოფება
საქართველო, 11 მარტი, საქინფორმი. გუშინ, 10 მარტს, საქართველოს პარლამენტის თავმჯდომარე დავით უსუფაშვილი საპარლამენტო დელეგაციასთან ერთად ოფიციალური ვიზიტით გაემგზავრა აშშ-ში, სადაც მას 25 შეხვედრა აქვს დაგეგმილი აშშ-ის აღმასრულებელი და საკანონმდებლო ხელისუფლების წარმომადგენლებთან. დელეგაციის შემადგენლობაში შედიან საგარეო ურთიერთობათა კომიტეტის თავმჯდომარე თედო ჯაფარიძე და თავდაცვისა და უშიშროების კომიტეტის წევრი, ფრაქცია „ქართული ოცნება – თავისუფალი დემოკრატების“თავმჯდომარე ირაკლი ჩიქოვანი.
შეხვედრები გაიმართება სახელმწიფო დეპარტამენტში, უშიშროების საბჭოსა და კონგრესის ბიბლიოთეკის ხელმძღვანელობასთან. ასევე, დაგეგმილია საჯარო გამოსვლები სხვადასხვა კვლევით ინსტიტუტში.
„ეს ჩემი პირველი ოფიციალური ვიზიტია უცხოეთში პარლამენტის თავმჯდომარის სტატუსით და გადავწყვიტე, რომ სწორედ ვაშინგტონში ჩავსულიყავით პირველ რიგში. დაგეგმილი შეხვედრებით ჩვენ ახალი ხელისუფლების ახალ ხედვებს გავაცნობთ ჩვენს მეგობრებს, იმისთვის, რომ გაღრმავდეს, გაძლიერდეს და კიდევ უფრო მყარი გახდეს ჩვენი ურთიერთობა, სტრატეგიული თანამშრომლობა ამერიკის შეერთებულ შტატებთან ყველა იმ მიმართულებით, რაც დღემდე არსებობდა. ვთვლი, რომ კიდევ მეტია შესაძლებელი“, – განაცხადა უსუფაშვილმა აშშ-ში გამგზავრებამდე თბილისის საერთაშორისო აეროპორტში.
