საქართველო, 26 თებერვალი, საქინფორმი. გუშინდელ სხდომაზე „ქართული ოცნება – დემოკრატიული საქართველოს“ პოლიტსაბჭომ შიდაპარტიულ საკითხებსა და რაიონული ორგანიზაციების თავმჯდომარეების შესახებ იმსჯელა.

სხდომის პარალელურად, „ქართუ ჯგუფის“ შენობასთან შეიკრიბნენ პარტიის რაიონული ორგანიზაციის წევრები.  მათი განცხადებით, 1-ლი ოქტომბრის შემდეგ ორგანიზაციაში გამოჩნდნენ მათთვის მანამდე უცნობი ადამიანები – ე.წ. ჩანერგილები, და გარკვეული ჯგუფები კოალიციაში განხეთქილების შეტანას ცდილობენ.

„დაფუძნების დღიდან რუსთავის ორგანიზაციაში ვმუშაობთ. წავედით ყველაფერზე, რაზე წასვლაც კი შეიძლებოდა. 1-ლი ოქტომბრის შემდეგ კი გამოჩნდნენ ადამიანები, რომლებიც სახეზე არ გვინახავს, ზოგიერთი „ნაციონალური მოძრაობის“ გამოკვეთილი წევრიც კი იყო. ისინი გვიმტკიცებენ, რომ „ქართული ოცნების“ წევრები არიან“, – აცხადებს „ქართული ოცნების“ წარმომადგენელი ანზორ ხუციშვილი.