საქართველო, 20 ნოემბერი, საქინფორმი. „ახალგაზრდა ადვოკატები“ მოუწოდებს საქართველოს შინაგან საქმეთა სამინისტროს, რათა საჯაროდ მოხდეს უკანონო სატელეფონო საუბრების მოსასმენი აპარატურის დემონტაჟი (ეს აპარატურა საქართველოში აშშ-ის სპეცსამსახურების სპეციალისტებმა ჩამოიტანეს და დაამონტაჟეს - საქინფორმი).„ჩვენთვის უაღრესად მნიშვნელოვანია ქვეყნის ახალი შინაგან საქმეთა მინისტრ ირაკლი ღარიბაშვილის პირველივე განცხადება, კერძოდ, სატელეფონო საუბრების მოსმენის, ინტერნეტკონტროლის და მსგავსი უკანონო ქმედებების სამართალდამცველების მხრიდან აკრძალვის შესახებ, თუმცა საზოგადოების ხანგრძლივი სიმშვიდისთვის საჭიროა ინიციატივის საჯაროდ დემონსტრირება“, – აცხადებს ორგანიზაცია.

ამასთან, მათი განცხადებით, დაკავშირებული მოთხოვნის უზრუნველყოფა აუცილებლად უნდა განხორციელდეს არასამთავრობო ორგანიზაციების ერთობლივი თანამონაწილეობით, რისთვისაც საჭიროა შეიქმნას არასამთავრობო სექტორის მონაწილეობით დამოუკიდებელი კომისია, რომლის შემადგენლობაშიც შევლენ სპეციალისტებიც. მეტიც, შსს-ის მხრიდან უკანონო მოსასმენი სისტემის დემონტაჟის პროცესს მონიტორინგი გაუწიოს საქართველოს იუსტიციის სამინისტრომ, ხოლო საკითხთან მიმართებით როგორც შსს, ისე იუსტიციის სამინისტრომ ანგარიში ჩააბაროს საქართველოს პარლამენტს. უნდა მოხდეს უკანონო სატელეფონო საუბრების აპარატის თუნდაც ქვეყნიდან გატანა.

„მიგვაჩნია, რომ მოცემული შემთხვევა სამართლიანობის აღდგენის და საზოგადოების სახელმწიფოსთან ნდობის საუკეთესო  შესაძლებლობა და წინაპირობა იქნება“, – აცხადებენ ახალგაზრდა ადვოკატები.