საზოგადოება
თელასის თანამშრომლები გაიფიცნენ
თბილისი, 8 ნოემბერი, საქინფორმი. დღეს დილიდან პარალიზებულია სააქციო საზოგადოება „თელასის“ მუშაობა. კომპანიის მუშაკები ზაფხულში სამსახურიდან უკანონოდ დათხოვნილი 125 თანამშრომლის აღდგენას და ხელმძღვანელობის შეცვლას მოითხოვენ. მათივე თქმით, კომპანიის თანამშრომლებმა დახმარებისთვის ენერგეტიკის მინისტრ კახა კალაძესაც მიმართეს, რომელმაც მათ დახმარება და გვერდში დგომა აღუთქვა. თუმცა „თელასის“ ხელმძღვანელობა, კერძოდ კი, გენერალური დირექტორი აშოტ მანუკიანი, მათ მოთხოვნებს უგულებელყოფს.
ქვეყანაში მიმდინარე საპროტესტო გაფიცვებზე კომენტარი საქართველოს ეკონომიკისა და მდგრადი განვითარების მინისტრმა გიორგი კვირიკაშვილმა გააკეთა და განაცხადა, რომ ამ პრობლემების მოსაგვარებლად სპეციალური კომისია შეიქმნება.
„ჩვენ გუშინაც გავაკეთეთ განცხადება, რომ პრემიერის ხელმძღვანელობით შეიქმნება სპეციალური კომისია, რომელიც ამ შრომითი ურთიერთობების მედიატორი გახდება და ვფიქრობთ, რომ ძალიან ეფექტური მექანიზმი იქნება იმისათვის, რომ დარეგულირდეს ეს ურთიერთობები“, – აღნიშნა მინისტრმა.
