თბილისი, 5 ნოემბერი, საქინფორმი. ქსნის საპატიმრო ტერიტორიაზე განვითარებული მოვლენების შესახებ დილით უკვე იუწყებოდა საქინფორმი. თუმცა ვითარება არც ამ ეტაპზე შეცვლილა. პატიმრები საკნებში არ შედიან და გადმოძახილებით ახმიანებენ თავიანთ მოთხოვნებს: „ჩვენი მოთხოვნები არის უცვლელი. რომლებმაც პირები გაიკერეს, არის ხელებით გადაბმულები ერთმანეთზე. მთელი ზონა ვშიმშილობთ, ნაჩალნიკი თავის 6 კაცთან ერთად უნდა წავიდეს. რაც გვეკუთვნის, ყველაფერი უნდა მოგვცენ. გამოდის მინისტრი და იძახის, თუ ადმინისტრაციას არ დაემორჩილებიან, მაშინ შევუგზავნით სპეცნაზსო. პატიმრის მშობლებზე იძახის – ყველანი დაისჯებიანო... ამათ უნდათ, რომ ჩვენ შევიდეთ კამერებში, ჩაგვკეტონ და შემოიყვანონ სპეცნაზი. და ჩვენ მაგის გამო დაგვლეწავენ“...

პატიმრების მშობლები აცხადებენ, რომ რამდენიმე ათეული პატიმარი ერთმანეთზეა გადაკერილი, 31 პატიმარს პირი აქვს ამოკერილი, შიმშილობენ 18 წლის ახალგაზრდები. პატიმრების მშობლებმა და ახლობლებმა სოზარ სუბარის სახელზე მიმართვა შეიმუშავეს, სადაც სთხოვენ, ადგილზე გაეცნოს პატიმართა მიერ წამოყენებულ ყველა მოთხოვნას.

ქსნის მე-15 დაწესებულებიდან დღეს გათავისუფლებული რამდენიმე პატიმარი არ ადასტურებს შიგნით არსებულ გამწვავებულ მდგომარეობას. საზოგადოებრივი მინიტორინგის ჯგუფის წარმომადგენელი ჟურნალისტი ამ ეტაპზე საპატიმროს ტერიტორიაზე იმყოფება.

განვითარებულ მოვლენებთან დაკავშირებით გაკეთებულ განცხადებაში სასჯელაღსრულების მინისტრი სოზარ სუბარი ამბობს, რომ კანონგარეშე ქმედებები დაუშვებელია არა მხოლოდ ციხის თანამშრომლების, არამედ პატიმრებისა და მათი ახლობლების მხრიდანაც. ამიტომ დარღვევებისთვის ნებისმიერი მათგანი მკაცრად დაისჯება. დაიწყება საპყრობილეების პერიმეტრის გაკონტროლებაც, სადაც აქციების გამართვა კანონით აკრძალულია.