თბილისი, 5 ოქტომბერი, საქინფორმი. ამ წუთებში სახელმწიფო კანცელარიაში საპარლამენტო არჩევნებში გამარჯვებული კოალიცია „ქართული ოცნებისა“ და ოპოზიციაში გადასული „ნაციონალური მოძრაობის“ საკონსულტაციო ჯგუგების  მოლაპარაკებები მიმდინარეობს ხელისუფლების გადაცემის პროცესის თაობაზე. როგორც უკვე ცნობილია, გამარჯვებული კოალიციის მხრიდან სამუშაო ჯგუფს წარმოადგენენ დავით უსუფაშვილი, ირაკლი ღარიბაშვილი, სოზარ სუბარი და ირაკლი ალასანია, „ნაციონალური მოძრაობის“ წარმომადგენლები კი დავით ბაქრაძე, გიგა ბოკერია, გიგი უგულავა და პალიკო კუბლაშვილი არიან. შეხვედრა დახურულ კარს მიღმა მიმდინარეობს და შეხვედრის დეტალები ჯერჯერობით უცნობია.

თუმცა, ცოტა ხნით ადრე, ჟურნალისტებთან საუბრისას, ირაკლი ალასანიამ განაცხადა, რომ ამ შეხვედრის მიზანი საქართველოსთვის უმნიშნელოვანესი საკითხების გადაჭრაა, რადგან ქვეყანას სასწრაფოდ ესაჭიროება ჩამოყალიბებული მთავრობა.

კოალიციის კიდევ ერთი ლიდერის, დავით უსუფაშვილის, თქმით კი „კონსულტაციები შეეხება საპარლამენტო უმრავლესობისა და უმცირესობის წარმომადგენელთა შორის ადგილების გადანაწილებას“. მისივე განმარტებით, „აწ უკვე ოპოზიციური პარტიის წარმომადგენლებმა, კონსტიტუციისა და პარლამენტის რეგლამენტის მიხედვით, უმაღლეს საკანონმდებლო ორგანოში გარკვეული თანამდებობები უნდა მიიღონ“.

თავის მხრივ, „ნაციონალური მოძრაობის“ წარმომადგენლებმა განაცხადეს, რომ მათი მიზანი „მშვიდ და დემოკრატიულ ვითარებაში, ქაოსისა და ძალადობის გარეშე „ქართული ოცნებისთვის“ ხელისუფლების გადაცემაა“.