თბილისი, 21 აგვისტო, საქინფორმი. ცენტრალურმა საარჩევნო კომისიამ 1 ოქტომბრის საპარლამენტო არჩევნებში მონაწილე სუბიექტებად 2 ბლოკი და 21 პარტია დაარეგისტრირა, 8 პარტიას კი რეგისტრაციაზე უარი უთხრა.

ბლოკში – „გიორგი თარგამაძე – ქრისტიან-დემოკრატიული გაერთიანება“ – ერთიანდებიან ამჟამინდელ საპარლამენტო უმცირესობაში შემავალი პარტიები  – „ქრისტიან-დემოკრატიული მოძრაობა“ და პაატა დავითაიას „ევროპელი დემოკრატები“. ეს პარტიები საარჩევნო პარტნიორები იყვნენ 2010 წლის ადგილობრივ არჩევნებზეც.

საარჩევნო ბლოკში – „ბიძინა ივანიშვილი – ქართული ოცნება“ – შემდეგი ექვსი პარტიაა გაერთიანებული: „ქართული ოცნება – დემოკრატიული საქართველო“, „კონსერვატიული პარტია“, „მრეწველები“, „საქართველოს რესპუბლიკური პარტია“, „ჩვენი საქართველო – თავისუფალი დემოკრატები“ და „ეროვნული ფორუმი“.