საზოგადოება
მერაბიშვილის შეხვედრა სადაზღვევო კომპანიებისა და რაისაავადმყოფოების წარმომადგენლებთან
თბილისი, 30 ივლისი, საქინფორმი. საქართველოს პრემიერ-მინისტრი ვანო მერაბიშვილი და შრომის, ჯანმრთელობისა და სოციალური დაცვის მინისტრი ზურაბ ჭიაბერაშვილი სადაზღვევო სექტორისა და რაიონული საავადმყოფოების მმართველი კომპანიების ხელმძღვანელებს შეხვდნენ. შეხვედრაზე პრემიერ-მინისტრი დაინტერესდა, იზრდება თუ არა საქართველოს სხვადასხვა რაიონში ახლად გახსნილ საავადმყოფოებში სამედიცინო პერსონალის ხელფასი, ამ საავადმყოფოებში პაციენტთა მიმართვიანობის მნიშვნელოვანი ზრდის პარალელურად.
შეხვედრის შემდეგ რაიონული საავადმყოფოების მმართველიკომპანიების ხელმძღვანელებმა განაცხადეს, რომ 2012 წლის 1 სექტემბრიდან მათ დაქვემდებარებაში მყოფ რაიონულ საავადმყოფოებში ექთნის ხელზე ასაღები მინიმალური ხელფასი 200 ლარი იქნება. იმ ექთნებს, რომლებიც მანამდე ხელზე 200-დან 350 ლარამდე იღებდნენ, ხელფასი 20%-ით გაეზრდებათ, ხოლო ვინც 350-დან 500 ლარამდე იღებდა – 10%-ით. კომპანიების ხელმძღვანელებმა განაცხადეს, რომ 2012 წლის 1 აგვისტოდან მათ ჰოსპიტალურ ქსელში მომუშავე მთელი სამედიცინო პერსონალი დაზღვეული იქნება.
პრემიერ-მინისტრის განცხადებით, მუშაობა გაგრძელდება, რათა ხელფასების ზრდა შეეხოს როგორც ექიმებს, ისე უმცროს სამედიცინო პერსონალს, მათ შორის, იმ სამედიცინო დაწესებულებებში, რომლებიც სადაზღვევო კომპანიების მფლობელობაში არ შედის.
შეხვედრას ესწრებოდნენ სადაზღვევო კომპანიები: „ალდაგი-BCI“, „ალფა“, „არქიმედეს გლობალ ჯორჯია“, „ჯი პი აი ჰოლდინგი“, „აი სი ჯგუფი“ და „ირაო“, ასევე, მათ მფლობელობაში არსებული რაიონული საავადმყოფოების მმართველი კომპანიები: „არქიმედეს კლინიკა“, „მედ ალფა“, „მედიქალ პარკი – საქართველო“, „ჩემი ოჯახის კლინიკა“ და „ჯეო ჰოსპიტალსი“.
