პოლიტიკა
სააკაშვილმა ქართული დიასპორის წარმომადგენლებს თანამემამულის მოწმობები გადასცა

1-mowmoba-politika-3თბილისი, 18 ივნისი, საქინფორმი. საქართველოს პრეზიდენტმა მიხეილ სააკაშვილმა 16 ივნისს პრეზიდენტის სასახლეში მსოფლიოს სხვადასხვა ქვეყნის ქართული დიასპორის წარმომადგენლები მიიღო და თანამემამულის სტატუსის დამადასტურებელი მოწმობები გადასცა. შეკრებილების წინაშე სიტყვით გამოსვლისას პრეზიდენტმა უცხოეთში მცხოვრებ თანამემამულეებთან კავშირის შენარჩუნების მნიშვნელობაზე ილაპარაკა, განსაკუთრებით, მათთან, ვინც საზღვარგარეთ დაიბადა და გაიზარდა. „ამიტომ ჩვენთვის ძალზე მნიშვნელოვანია ორმაგი მოქალაქეობის ლეგალიზება, ხოლო იქ, სადაც ეს შეუძლებელია ან სხვადასხვა მიზეზით და სუბიექტური გადაწყვეტილებით არ ხერხდება, ჩვენს თანამოქალაქეებს თანამემამულის მოწმობებს დავურიგებთ“, – განაცხადა სააკაშვილმა.

მისივე ინფორმაციით, უახლოეს თვეებში შეიქმნება სრულიად ქართველთა მსოფლიო ასამბლეა შტაბბინით თბილისში. სხვადასხვა ქვეყნის ქართული დიასპორების წარმომადგენლებს ამ ასამბლეაში თანამემამულეთა მოწმობის საფუძველზე აირჩევენ. თბილისში რეგულარულად გაიმართება ამ ორგანიზაციის სესიები.