თბილისი, 4 ივნისი, საქინფორმი. როგორც საქინფორმს კოალიცია „ქართული ოცნების“ პრესსამდივნოდან ატყობინებენ, 3 ივნისს, დაახლოებით, 22 საათზე, თბილისში, წმიდა ნიკოლოზის სახელობის ეკლესიის მიმდებარე ტერიტორიიდან გატაცებულ იქნა „ქართული ოცნების“ წევრი, საქართველოს ჩემპიონი ძიუდოში ამბაკო ავალიანი, რომელსაც თან ახლდნენ სპორტსმენი ზურა ბენდელიანი და ნათესავი ირაკლი გულბანი.

კოალიციის განცხადებაში, კერძოდ, ნათქვამია: „თვითმხილველების ცნობით, ამბაკო ავალიანს მთელი დღის განმავლობაში ტელეფონით უკავშირდებოდა მისი ძველი თანაგუნდელი სინჯიკაშვილი და სთხოვდა შეხვედრას, თან არწმუნებდა, რომ ჩამოშორებოდა პოლიტიკურ კოალიცია „ქართულ ოცნებას“. ბოლოს ამბაკო ავალიანი დათანხმდა და მანქანა შეაჩერა ზემოხსენებულ ეკლესიასთან, სადაც სინჯიკაშვილი უნდა მისულიყო. სინჯიკაშვილი შეხვედრის ადგილას ორი ჯიპითა და სამი მსუბუქი მანქანით ოც თანმხლებ პირთან ერთად მივიდა. მათ ავალიანი ავტომანქანაში ჩასვეს და გაურკვეველი მიმართულებით წაიყვანეს. მას შემდეგ ავალიანს მობილური ტელეფონი გამორთული აქვს და მასთან დაკავშირება ვერ ხერხდება.

სასწრაფო რეაგირების მიზნით, „ქართული ოცნება“ 22.40 საათზე დაუკავშირდა უშიშროების საბჭოსთან არსებულ უწყებათაშორის კომისიას“.