სამართალი
„კონსტიტუციის 42-ე მუხლი“ „ამნესტი ინტერნეიშენალის“ ანგარიშს მიესალმება
თბილისი, 25 მაისი, საქინფორმი. „კონსტიტუციის 42-ე მუხლი“ მიესალმება საერთაშორისო უფლებადამცველი ორგანიზაცია „ამნესტი ინტერნეიშენალის“ ანგარიშს, რომელიც 2011 წელს განვითარებულ ადამიანის უფლებათა მდგომარეობას ასახავს მთელ მსოფლიოში, მათ შორის, საქართველოშიც.
მოხსენებაში საქართველოსთან მიმართებაში სამი ძირითადი საკითხია გამოყოფილი: პოლიციის მიერ დემონსტრაციების დარბევისას გადამეტებული ძალის გამოყენება; იძულებით გადადგილებულ პირთა გამოსახლებისას საერთაშორისო სტანდარტების დარღვევა; შემაშფოთებელი მდგომარეობა მართლმსაჯულების დამოუკიდებლობასთან მიმართებაში. ანგარიშში საუბარია მართლმსაჯულების სისტემის დამოუკიდებლობაზეც.
„კონსტიტუციის 42-ე მუხლი“ კიდევ ერთხელ აღნიშნავს ადამიანთა უფლებების კუთხით არსებულ საგანგაშო მდგომარეობას, განსაკუთრებით, სახელმწიფოს არაეფექტიან როლს. ორგანიზაცია მიიჩნევს, რომ უმრავლეს შემთხვევაში სახელმწიფო არ ასრულებს პოზიტიურ ვალდებულებას და ადამიანის უფლებათა დარღვევების შემთხვევაში არ ატარებს ეფექტიან გამოძიებას.
