თბილისი, 25 მაისი, საქინფორმი. საქართველომ სახელმწიფოს კუთვნილი „საქართველოს რკინიგზის“ 25%-მდე აქციების ლონდონის საფონდო ბირჟაზე პირველადი განთავსება (Initial Public Offering, IPO) გადადო.

„საქართველოს მთავრობამ გადაწყვიტა, ამ ეტაპზე გადადოს სს „საქართველოს რკინიგზის“ IPO იმ გამოწვევების გამო, რაც ამჟამად კაპიტალის ბაზრებზე არსებობს“, – ნათქვამია „საქართველოს რკინიგზის“ მოკლე განცხადებაში, რომელიც 24 მაისს გავრცელდა.

პრემიერ-მინისტრმა ნიკა გილაურმა 24 მაისს მთავრობის სხდომაზე გადავადების მიზეზებზე საუბრისას აღნიშნა: „25%-ის ფინანსურ ბაზრებზე გატანა გადავდეთ ჩვენ მომავლისათვის, როცა ბაზრებზე მდგომარეობა გამოსწორდება“.

გასულ კვირას „საქართველოს რკინიგზამ“ აქციათა ღირებულება დაადგინა. სახელმწიფოს კუთვნილმა სს „საპარტნიორო ფონდმა“, რომელიც რკინიგზის აქციათა გამყიდველად მოქმედებს, 16 მაისს განაცხადა, რომ აქციების პირველადი განთავსების შედეგად, რომელიც თავდაპირველად 24 მაისს იგეგმებოდა, 200-დან 250 მილიონ აშშ დოლარამდე თანხის მიღებას ელის.

„როიტერის“ ცნობით, ბოლო ერთი კვირის განმავლობაში FTSE 100-ის ინდექსი (გაერთიანებულია ლონდონის საფონდო ბირჟაზე არსებული ასი უმსხვილესი კაპიტალიზაციის მქონე კომპანია), დაახლოებით, 3%-ით დაეცა.