საზოგადოება
ჟურნალისტთა სოლიდარობის აქცია
თბილისი, 24 მაისი, საქინფორმი. როგორც საქინფორმს მედიაკლუბიდან აცნობეს, 25 მაისს იუსტიციის სამინისტროს წინ გაიმართება ჟურნალისტთა სოლიდარობის აქცია, სადაც აქციის მონაწილეები ჟურნალისტებზე ზეწოლის ფაქტების სასწრაფოდ გამოძიებას და იმ ჩინოვნიკების დასჯას ითხოვენ, რომლებმაც ჟურნალისტებს პროფესიული მოვალეობის შესრულებაში ხელი შეუშალეს, თავს დაესხნენ, სიტყვიერი და ფიზიკური შეურაცხყოფა მიაყენეს ან უკანონოდ დააკავეს.
„ბოლო ორ თვეში ჟურნალისტებზე ზეწოლის 20 ფაქტი მოხდა. ხელისუფლება უარს ამბობს ამ ფაქტების გამოძიებაზე. არ დასჯილა არცერთი მოძალადე ჩინოვნიკი... შემოგვიერთდი! ერთად დავიცვათ ჩვენი უფლებები! ერთად მოვითხოვოთ ამ საქმეების გამოძიება! იყავი სოლიდარული!“, – ნათქვამია განცხადებაში.
აქციაზე გავრცელდება საქართველოში მოქმედი მედია ორგანიზაციებისა და ჟურნალისტების განცხადება, რომლის ადრესატი იქნება იუსტიციის სამინისტრო, საქართველოს პრეზიდენტი, საერთაშორისო საზოგადოება, რომელთაც მედიის წარმომადგენლები აღნიშნულ საკითხებზე ადეკვატურ რეაგირებას სთხოვენ.
