საზოგადოება
გურჯაანის რაიონში ნავთობის ღია ჭაბურღილი კონსერვაციას საჭიროებს
თბილისი, 18 მაისი, საქინფორმი. როგორც „თავისუფალი საქართველოს“ პრესსამსახური საქინფორმს ატყობინებს, გურჯაანის რაიონში, სოფელ ჭანდარში, სამონასტრო კომპლექსის მიმდებარე ტერიტორიაზე 30-იან წლებში დაკონსერვებული დალექილი ნავთობის ჭაბურღილი დღეს სავალალო მდგომარეობაშია.
პარტიის ინფორმაციით, ბოლო დროის წყალდიდობებმა და ხეტყის მასიურმა გაჩანაგებამ გამოიწვია ამ ჭაბურღილის გახსნა, საიდანაც გამოჟონილი ნავთობი ერევა ჭანდარის ხევში მიმავალ წყალს. ნიადაგში გაჟონილი ნავთობი ანადგურებს როგორც ნათესებს, ისე მრავალწლიან ნარგავებს. ხევში გამდინარე დაბინძურებული წყალი სერიოზულ საფრთხეს უქმნის მოსახლეობის ჯანმრთელობასაც.
პარტია „თავისუფალი საქართველოს“ გურჯაანის რაიონული ორგანიზაცია მოითხოვს, მუნიციპალიტეტის ხელმძღვანელობამ სასწრაფო რეაგირება მოახდინოს პრობლემაზე, რათა მოხდეს აღნიშნული ჭაბურღილის კონსერვაცია რაიონის ეკოლოგიური საფრთხის თავიდან ასაცილებლად.
