თბილისი, 16 მაისი, საქინფორმი. ამ ეტაპზე ქუთაისში საქართველოს პარლამენტის ახალი შენობის მშენებლობაზე 133, 7 მილიონი ლარი დაიხარჯა. ეს დღეს  ჟურნალისტებს  საქართველოს ფინანსთა მინისტრმა დიმიტრი გვინდაძემ აუწყა. მისი თქმით, სახელმწიფო ბიუჯეტიდან მშენებლობისთვის გამოყოფილი სახელმწიფო სახსრები სრულიად გამჭვირვალეა. თუმცა 2 დღის წინ - 14 მაისს,  თბილისში გაზეთ „ვზგლიადის“ კორესპონდენტს დიმიტრი გვინდაძემ განუცხადა, რომ  ქუთაისში საქართველოს პარლამენტის შენობის მშენებლობა სახელმწიფო ბიუჯეტს 825 მლნ დოლარი დაუჯდა (შიდა სამუშაოებისა და ტექნიკური აღჭურვის გარეშე – საქინფორმი).

როგორც საქინფორმი იუწყებოდა, მშენებლობა შემოდგომაზე დასრულდება, მაგრამ, მიხეილ სააკაშვილის მოთხოვნით, პირველად დეპუტატები ახალ პარლამენტში 26 მაისს,  საქართველოს სახელმწიფოებრივი დამოუკიდებლობის დღეს, შეიკრიბებიან. თუმცა საპარლამენტო ოპოზიცია ამ სხდომის ბოიკოტირებას აპირებს. პარლამენტის ვიცე-სპიკერმა ოპოზიციური „ქრისტიან-დემოკრატიული ფრაქციიდან“ ლევან ვეფხვაძემ განაცხადა, რომ ქუთაისში იგეგმება „არა სესია, არამედ პრეზიდენტ მიხეილ სააკაშვილის პიარაქცია“. დიმიტრი ლორთქიფანიძემ, ასევე, განაცხადა, რომ ქუთაისში არც მისი დეპუტატები ჩავლენ.

ამგვარად, დეპუტატებს მმართველი „ერთიანი ნაციონალური მოძრაობიდან“ ამ დღის გატარება დაუმთავრებელ შენობაში მოუწევთ.