თბილისი, 14 მაისი, საქინფორმი. ბიძინა ივანიშვილის განცხადებით, რუსეთში არსებული მისი ქონება მაისის ბოლომდე გაიყიდება და მას რუსეთთან საერთო არაფერი ექნება. ამის შესახებ ჟურნალისტებს კოალიცია „ქართული ოცნების“ ლიდერმა ბიძინა ივანიშვილმა გუშინ ლიბერალური ინტერნაციონალის წევრი ქვეყნების წარმომადგენლებთან არაოფიციალური შეხვედრის შემდეგ განუცხადა.

„ვიცოდი, რომ ბანკი უკვე იყიდებოდა და მე ვადასტურებ ამ ინფორმაციას. თქვენ სულ მალე გაიგებთ ჩემს ქონებაზე რუსეთში, რომ მაისის ბოლომდე ყველაფერი გაიყიდება. მერე იქნება საინტერესო, რაზე ისაუბრებენ „რუსთავი 2“, „იმედი“ და „პირველი არხი“? მერე რაღას მოაბამენ კუდს, როდესაც აღარ მექნება რუსეთთან აღარანაირი კავშირი. აი, ამ კითხვებისთვის მოემზადეთ თქვენ წინასწარ, კარგი იქნება, რომ რეპეტიცია გაიაროთ“, – განაცხადა ბიძინა ივანიშვილმა.

რუსული მედიის მიერ გავრცელებული ინფორმაციით, ბიძინა ივანიშვილმა ბანკი „როსიისკიი კრედიტი“ კერძო პირთა ჯგუფს 352 მილიონ აშშ დოლარად მიჰყიდა. ივანიშვილის დეველოპერულმა კომპანია „უნიკორმა“ კერძო ინვესტორებთან შესაბამის შეთანხმებასაც მოაწერა ხელი.

მყიდველებს შორის არიან: აი-ტი კომპანიის პრეზიდენტი გეორგი გენსი, ბანკ „გლობეკსის“ ყოფილი მესაკუთრე ანატოლი მოტილევი, სადაზღვევო კომპანია „Спасские ворота“-ს ექსმფლობელი ბორის ჰაიტი, ასევე, კერძო პირები: ბორის პასტუხოვი, ვიქტორ ლუკიანოვი, ვლადიმერ ფაეროვიჩი.