საქართველო, 11 მაისი, საქინფორმი. უშიშროების საბჭოს იწვევს საქართველოს პრემიერ-მინისტრი იმ მოცემულობიდან გამომდინარე, როდესაც საჭიროებას ხედავს და ამის საჭიროება დგას. ეს არ არის საკითხი, რომელიც შეიძლება, უშიშროების საბჭოს მოწვევის საფუძველი გახდეს, – ამის შესახებ საქართველოს საგარეო საქმეთა მინისტრმა ილია დარჩიაშვილმა განაცხადა, რომლითაც გამოეხმაურა პრეზიდენტ სალომე ზურაბიშვილის ხელისუფლებისადმი მოწოდებას, რომ „შეიკრიბოს უსაფრთხოების საბჭო საჯაროდ და განხილული იყოს რუსეთთან 3-თვიანი ვიზების დაწესების საკითხი“.

დარჩიაშვილის თქმით, საქართველოს პრემიერ-მინისტრი საბჭოს მოწვევას როცა საჭიროდ ჩათვლის, ამას აუცილებლად გააკეთებს.

„ეს არ არის საკითხი, რომელიც შეიძლება, უშიშროების საბჭოზე მსჯელობის საგანი გახდეს. ეს არის საკითხი, რომელზეც უკვე ვისაუბრეთ, რომელსაც ამ ეტაპზე არ აქვს ის მასშტაბი, რომელმაც შეიძლება გამოიწვიოს უშიშროების საბჭოს შეკრება. ამას გააკეთებს პრემიერ-მინისტრი ნებისმიერ იმ საკითხზე, რომელზეც ჩათვლის საჭიროდ, როდესაც იქნება შესაბამისი სიტუაცია და, პირველ რიგში, საჭიროება“, – აღნიშნა ილია დარჩიაშვილმა.

რუსეთის პრეზიდენტმა, ვლადიმერ პუტინმა წინა დღეს გამოსცა განკარგულებები, რომლებიც საქართველოსთან სავიზო რეჟიმის გაუქმებას და პირდაპირი ფრენების აღდგენას ითვალისწინებს.