სამართალი
„ქართული ოცნების“ კომუნიკაციების დეპარტამენტი: „საერთაშორისო გამჭვირვალობა - საქართველოს“ სტატია მიზნად ისახავს ქვეყნის პროგრესის ნეგატიურ კონტექსტში წარმოჩენას

 საქართველო, 1 თებერვალი, საქინფორმი. „ქართული ოცნების“ კომუნიკაციების დეპარტამენტი „საერთაშორისო გამჭვირვალობა – საქართველოს“ მიერ 2022 წლის „კორუფციის აღქმის ინდექსის“ შესახებ გამოქვეყნებულ სტატიას ეხმაურება.

როგორც „ქართული ოცნების“ კომუნიკაციების დეპარტამენტში აცხადებენ, „სინამდვილეში, საქართველო, პირველად ამ ინდექსის ისტორიაში, ევროპის საუკეთესო ოცეულშია“.

ასევე, „ქართული ოცნების“ კომუნიკაციების დეპარტამენტში ამბობენ, რომ „საერთაშორისო გამჭვირვალობა – საქართველოს“ აღნიშნული სტატია მანიპულაციურია და მიზნად ქვეყნის პროგრესის ნეგატიურ კონტექსტში წარმოჩენას ისახავს“.

საერთაშორისო გამჭვირვალობა-საქართველო“ აქვეყნებს სტატიას კორუფციის აღქმის ინდექსის 2022 წლის ანგარიშთან დაკავშირებით. ახალი ინდექსის მიხედვით, წინა წელთან შედარებით, საქართველოს შეფასება გაუმჯობესდა და მსოფლიოს 180 ქვეყანას შორის 45-ადგილიდან 41-ადგილზე გადაინაცვლა. მიუხედავად ამისა, „საერთაშორისო გამჭვირვალობა“ ცდილობს, ეს მიღწევა ნეგატიურ კონტექსტში წარმოაჩინოს, ისეთი ფრაზებით, როგორებიცაა „რამდენიმე ევროპულ ქვეყანას ვუსწრებთ“, „მნიშვნელოვნად წინ ვერ წავიწიეთ“ და ა.შ.

სინამდვილეში, საქართველო, პირველად ამ ინდექსის ისტორიაში, ევროპის საუკეთესო ოცეულშია. „საერთაშორისო გამჭვირვალობა – საქართველოს“ აღნიშნული სტატია მანიპულაციურია და მიზნად ქვეყნის პროგრესის ნეგატიურ კონტექსტში წარმოჩენას ისახავს. ფაქტი კი ის არის, რომ საქართველო ევროკავშირის 27 წევრი ქვეყნიდან 12 წევრს უსწრებს ან თანაბარი შედეგი აქვს. რაც შეეხება ევროკავშირის კანდიდატ ქვეყნებს, საქართველო ყველა კანდიდატ ქვეყანას დიდი უპირატესობით უსწრებს. ევროკავშირის წევრი ქვეყნები, რომელსაც საქართველო უსწრებს ან თანაბარი ადგილი აქვს: საქართველო – 41-ადგილი 1. ჩეხეთი – 41; 2. იტალია – 41; 3. სლოვენია – 41; 4. პოლონეთი – 45; 5. სლოვაკეთი – 49; 6. კვიპროსი – 51; 7. საბერძნეთი – 51; 8. მალტა – 54; 9. ხორვატია – 57; 10. რუმინეთი – 63; 11. ბულგარეთი – 72; 12. უნგრეთი – 77.

ევროკავშირის კანდიდატი ქვეყნები: საქართველო – 41-ადგილი; 1. მონტენეგრო – 65; 2. ჩრდ. მაკედონია – 85; 3. მოლდოვა – 91; 4. ალბანეთი – 101; 5. სერბეთი – 101; 6. თურქეთი – 101; 7. ბოსნია და ჰერცოგოვინა – 110; 8. უკრაინა – 116“, – ნათქვამია „ქართული ოცნების“ კომუნიკაციების დეპარტამენტის მიერ გავრცელებულ ინფორმაციაში.