პოლიტიკა
მეხუთე დღე, პირდაპირი რეპორტაჟი №6 საპროტესტო აქციიდან პარლამენტის შენობასთან, 25 მაისი, 2011 წელი, თბილისი

akcia_tel2219.00. აქციის მონაწილეებს პარლამენტის წინ ხალხი ემატება. 4000-მდე მომიტინგემ შეავსო კინოთეატრი „რუსთაველიდან“ სასრუმრო „თბილისი-მარიოტამდე“ არსებული სივრცე, მათ ტერიტორია რკინის ზღუდეებით შემოსაზღვრეს (დარბევის შემთხვევისათვის).

სულ ცოტა ხნის წინათ საპროტესტო აქციაზე მცირე ინციდენტი მოხდა – უცნობმა ახალგაზრდებმა სიტყვიერი და ფიზიკური შეურაცხყოფა მიაყენეს ირაკლი ბათიაშვილის მეუღლეს, მაგრამ აქციის მონაწილეებმა პროვოკაცია მალევე აღკვეთეს; უნდა ითქვას – ფიზიკური ძალის გამოყენებით.

აქციას შეუერთდა „დამოუკიდებელ სტუდენტთა კავშირი“, ადა მარშანია და კიდევ რამდენიმე წარმომადგენელი სხვადასხვა პარტიიდან, რომლებმაც დატოვეს საკუთარი პარტიები და გადმოვიდნენ „სახალხო კრებაში“. ასეთთა შორისაა რუსუდან ფოცხიშვილი, რომელმაც დატოვა „ეროვნული ფორუმი“.

აქციას შეუერთდნენ, ასევე, აქტივისტები აჭარიდან, რომლებიც თბილისში დაბრკოლების გარეშე ჩამოვიდნენ.

„მაესტრო“ და „მეორე არხი“ დროდადრო პირდაპირ ტრანსლაციას რთავენ, მაგრამ არა უმეტეს 10-15 წუთისა.