საქართველო, 3 დეკემბერი, საქინფორმი. არსებული ეპიდემიოლოგიური მდგომარეობიდან გამომდინარე, გადაწყვეტილება მივიღეთ, რომ წელს საახალწლო სოფელი ვერ გაკეთდება, – ამის შესახებ დედაქალაქის მერმა კახა კალაძემ თბილისის მთავრობის სხდომაზე განაცხადა.

როგორც კახა კალაძემ აღნიშნა, საახალწლო სოფლის მოწყობა დაახლოებით 700-800 ათასი ლარი ჯდებოდა და ეს, რაც უნდა დახარჯულიყო საახალწლო სოფლის მოწყობაში, მიმართული იქნება სარეზერვო ფონდში.

„მინდა, შევეხო საახალწლო ღონისძიებებს. მინდა, ვისაუბრო საახალწლო სოფელთან დაკავშირებით. არსებული ეპიდემიოლოგიური მდგომარეობიდან გამომდინარე, ჩვენ ვიცით, რა რთული ვითარება გვაქვს ქვეყანაში და რა რთული ვითარებაა მთელ მსოფლიოში. მთელი მსოფლიო ებრძვის არსებულ პანდემიას, ვირუს „კოვიდ-19“-ს და შეზღუდვები, რომელიც დაწესებულია, არის იმისთვის, რომ გავუფრთხილდეთ ერთმანეთის ჯანმრთელობის, უსაფრთხოებას, გავუფრთხილდეთ ერთმანეთის სიცოცხლეს. გადაწყვეტილება მივიღეთ, რომ წელს საახალწლო სოფელი ვერ გაკეთდება, რადგან ეს ფაქტობრივად ქმნის მიზიდულობის ცენტრს. ძალიან დიდი საფრთხე იყო, რომ ბევრი ადამიანი მივიდოდა ბავშვებით, ბებიებით, ბაბუებით და გაჭირდებოდა ზოგადად კონტროლი, უხერხული იქნებოდა მოსული ადამიანისთვის გეთქვა, რომ თქვენ არ შეხვიდეთ საახალწლო სოფელში, რადგან ბევრი ხალხია. შესაბამისად, გადაწყვეტილება მივიღეთ, რომ საახალწლო სოფელი წელს არ გაკეთდება. ჩვენ დაახლოებით 700-800 ათასი ლარი გვიჯდებოდა საახალწლო სოფლის გაკეთება. ეს თანხა, რომელიც უნდა დახარჯულიყო საახალწლო სოფლის მოწყობაში, მიმართული იქნება სარეზერვო ფონდში. ჩვენ დავეხმარებით იმ ოჯახებსა და ადამიანებს, ვისაც ყველაზე მეტად სჭირდება ჩვენი მხარდაჭერა. ეს იქნება საკვები პროდუქტებით უზრუნველყოფა წინასაახალწლო დღეებში. ამისთვის ჩვენ უკვე შექმნილი გვაქვს სპეციალური პლატფორმას, უკვე ნახევარი მილიონი ლარი იქნა გამოყოფილი სარეზერვო ფონდიდან და ხდება საკვები პროდუქტებით მომარაგება. მომდევნო დღეების განმავლობაში დავიწყებთ დარიგებას. ეს არის უმწეო მოხუცები, რომლებიც მძიმე მდგომარეობაში არიან. ჩვენ გვაქვს მონაცემთა სრული ბაზა ამ გაჭირვებული ოჯახების, ამიტომ მაქსიმალურად ხელი უნდა შევუწყოთ და დავეხმაროთ“, – განაცხადა კახა კალაძემ.

მისივე თქმით, ყოველწლიურად 330 მილიონი ლარზე ცოტა მეტია განსაზღვრული ბიუჯეტში სოციალური და ჯანდაცვის მიმართულებით. ეს არის იმ ადამიანებისთვის, ვისაც ყველაზე მეტად სჭირდება დახმარება.

„ერთადერთი მიმართულება, რომელსაც ერთი თეთრი არ მოკლებია არსებული პანდემიის პირობებში, ეს იყო ზუსტად ჯანდაცვა და სოციალური მიმართულება, რადგან ყველას კარგად გვესმის, რომ ეს თანხები უნდა დაიხარჯოს იმ ოჯახებისთვის, ვისაც ყველაზე მეტად სჭირდება ჩვენი გვერდით დგომა“, – განაცხადა კახა კალაძემ.