საქართველო, 4 თებერვალი, საქინფორმი. ე.წ. ციანიდის საქმეზე მსჯავრდებული დეკანოზის გიორგი მამალაძის საქმე სტრასბურგის ადამიანის უფლებათა ევროპულ სასამართლოში გაიგზავნა.

ამის შესახებ „ინტერპრესნიუსს“ იურისტმა დავით ჯანდიერმა განუცხადა. ის საჩივრის შინაარსზე არ ლაპარაკობს, თუმცა, იმედს გამოთქვამს, რომ სტრასბურგის სასამართლო ამ საქმეში ადამიანის უფლებების დარღვევის შესახებ ხედვას გაითვალისწინებს.

„კონვენციით დადგენილ 6-თვიან ვადაში, 31 იანვარს, დეკანოზ გიორგი მამალაძის სახელით საჩივარი სტრასბურგის ადამიანის უფლებათა ევროპულ სასამართლოში ჩემს მიერ გაიგზავნა. მესმის, ინტერესი დიდია, რა ფაქტებს ეფუძნება საჩივარი და კონვენციის რომელი მუხლების დარღვევაზე ვამახვილებ სასამართლოს ყურადღებას, თუმცა, დეკანოზთან პირველივე შეხვედრაზე ჩემივე თხოვნით შევთანხმდით, რომ საჩივრის შინაარსზე, სანამ სასამართლო შემდგომ პროცედურას არ დაიწყებს, საუბარი არ გვექნება. ერთადერთი, ამ ეტაპზე შემიძლია გამოვთქვა იმედი, რომ სტრასბურგის სასამართლო გაიზიარებს ხედვას ამ საქმეში ადამიანის უფლებების დარღვევის შესახებ“, - აცხადებს ჯანდიერი.

შეგახსენებთ, რომ 2017 წლის 5 სექტემბერს თბილისის საქალაქო სასამართლომ დეკანოზ გიორგი მამალაძეს 9 წლით თავისუფლების აღკვეთა შეუფარდა. განაჩენი ორივე მხარემ გაასაჩივრა. პროკურატურა განაჩენის დამძიმებას, დაცვა კი გამამართლებელ განაჩენს ითხოვდა. სააპელაციო სასამართლომ არც ერთი მხარის მოთხოვნა არ დააკმაყოფილა და ძალაში საქალაქო სასამართლოს გადაწყვეტილება დატოვა. უზენაესმა სასამართლომ კი აღნიშნული სისხლის სამართლის საქმე წარმოებაში საერთოდ არ მიიღო.