საქართველო, 28 იანვარი, საქინფორმი. თბილისის ვიცე-მერმა ირაკლი ხმალაძემ კომენტარი გააკეთა ადგილობრივ ხელისუფლებაში კორუფციასთან დაკავშირებული ბოლო სისხლის სამართლის საქმეზე და ყველა გააფრთხილა კანონდარღვევით გამოწვეულ შედეგებზე.

სახელმწიფო უსაფრთხოების სამსახურმა (სუს) პარასკევს წყალტუბოს საკრებულოს თავმჯდომარე გრიგოლ ივანეიშვილი 250 000 ლარის ოდენობის ქრთამის აღების ბრალდებით დააკავა. შაბათს მისთვის გაწეული დახმარების ბრალდებით ვაკის გამგებლის მოადგილე თეიმურაზ ჩოჩუა დააკავეს.

„მე წინასწარ ბრალზე ვერ ვისაუბრებ, რადგან ამას აქვს შესაბამისი სამართლებრივი პროცესი და არ მინდა, მოვლენებს წინ გავუსწრო, მაგრამ მინდა, ყველა თანამშრომელმა, ვინც კი მუნიციპალიტეტში მუშაობს, მიიღოს გაფრთხილება, ვისაც კი ასეთი რამ გაუფიქრებია, ბოლომდე მოგყვებით“, - განაცხადა ირაკლი ხმალაძემ.

მისი თქმით, მიმდინარე წლის დასაწყისში, თბილისის მთავრობის პირველსავე სხდომაზე მერმა კახი კალაძემ გააფრთხილა თანამშრომლები, რომ კორუფციაში ჩაბმა არ გაებედათ.

„ძალიან ცუდია, რომ ყველამ ჯერ კიდევ ვერ გაიგო, ჩვენ არ დავუშვებთ კორუფციას და ვიქნებით უმკაცრესები ამგვარი ფაქტების გამოვლენისას“, - განაცხადა ხმალაძემ.

რაც შეეხება გამოძიებას, თეიმურაზ ჩოჩუამ გრიგოლ ივანეიშვილს დააკავშირა უცხოელი ბიზნესმენი, რომელიც ქალაქ წყალტუბოში მდებარე საკრებულოს ყოფილი შენობის შესყიდვით იყო დაინტერესებული. ის კი უცხოელ ბიზნესმენს აღნიშნული შენობის წინასწარ შეთანხმებულ ფასად აუქციონზე გატანას და აღნიშნული აუქციონის გზით ხსენებული ქონების შესყიდვაში დახმარებას დაჰპირდა, რის სანაცვლოდაც ქრთამის სახით 250 000 ლარის გადახდა მოსთხოვა.

უწყების ცნობით, თეიმურაზ ჩოჩუამ გარანტიის სახით, უცხოელი ბიზნესმენის მიერ დაფუძნებული კომპანიის 16%-იანი წილი ივანეიშვილის ნდობით აღჭურვილ პირს გადაუფორმა.