საქართველო, 25 სექტემბერი, საქინფორმი. საპრეზიდენტო არჩევნებში მონაწილეობას სულ 25 კანდიდატი მიიღებს, რომელთაგან 19 - პოლიტიკური პარტიების, ხოლო 6 საინიციატივო ჯგუფების მიერაა წარდგენილი. ამის შესახებ ცესკო-ში გამართულ ბრიფინგზე განაცხადეს. პრეზიდენტობის კანდიდატად რეგისტრაციის მოთხოვნით ცესკოში სულ 46 განაცხადი იყო წარდგენილი, მათ შორის 20 - პოლიტიკური პარტიის, ხოლო 26 საინიციატივო ჯგუფების მიერ. 19 საინიციატივო ჯგუფს მათ მიერ წარდგენილი კანდიდატების რეგისტრაციაზე უარი ეთქვა, რადგან, ცესკო-ს ინფორმაციით, მათ კანონით დადგენილ ვადებში ვერ წარადგინეს მხარდამჭერთა სიები. ერთ საინიციატივო ჯგუფს კანდიდატის რეგისტრაციაზე უარი ეთქვა საარჩევნო დოკუმენტაციაში ხარვეზის შეუსწორებლობის გამო, ერთ პოლიტიკურ პარტიას კი იმ მიზეზით, რომ პარტია იუსტიციის სამინისტროში არ იყო რეგისტრირებული. რაც შეეხება დარეგისტრირებულ 25 კანდიდატს, მათ არაუგვიანეს 16 ოქტომბრისა უფლება აქვთ, წერილობით მიმართონ ცესკო-ს საკუთარი კანდიდატურის მოხსნის თაობაზე. ამ ვადის ამოწურვის შემდეგ ყველა კანდიდატი შეტანილი იქნება საარჩევნო ბიულეტენში.
2018 წლის 28 ოქტომბრის საპრეზიდენტო არჩევნებისათვის დარეგისტრირებული კანდიდატების სია:
1. დავით ბაქრაძე - პ/გ „ევროპული საქართველო - მოძრაობა თავისუფლებისთვის“ - N2;
2. მიხეილ (გელა) სალუაშვილი - პ/გ „სამართლიანობის აღდგენის კავშირი ხმა ერისა: უფალია ჩვენი სიმართლე” - N28;
3. ზვიად ბაღდავაძე - პ/გ „სამოქალაქო პლატფორმა - ახალი საქართველო“ – N27;
4. შალვა ნათელაშვილი - „საქართველოს ლეიბორისტული პარტია“ - N10;
5. ირაკლი გორგაძე - - პ/გ „მოძრაობა თავისუფალი საქართველოსთვის“ - N23;
6. გრიგოლ ვაშაძე - „ერთიანი ნაციონალური მოძრაობა“ - N5;
7. გიორგი ლილუაშვილი - პ/გ „საქართველო“ - N17;
8. სალომე ზურაბიშვილი - ამომრჩეველთა საინიციატივო ჯგუფი - N48;
9. ზვიად მეხატიშვილი – პ/გ „საქართველოს ქრისტიან-კონსერვატიული პარტია“ - N13
10. ვახტანგ გაბუნია – პ/გ „ქრისტიან-დემოკრატიული მოძრაობა“ - N4
11. დავით უსუფაშვილი – პ/გ „თავისუფალი დემოკრატები“ - N25
12. ბესარიონ თედიაშვილი – ამომრჩეველთა საინიციატივო ჯგუფი - N49
13. ლევან ჩხეიძე – პ/გ „ახალი ქრისტიან-დემოკრატები“ - N40
14. ზვიად იაშვილი – პ/გ „ეროვნულ-დემოკრატიული პარტია“ - N30
15. ზურაბ ჯაფარიძე – „გირჩი“ - N36
16. აკაკი ასათიანი – ,,ქართველ ტრადიციონალისტთა კავშირი“ - N18
17. გელა ხუციშვილი – პ/გ „საქართველოს ძალოვან ვეტერანთა და პატრიოტთა პოლიტიკური მოძრაობა“ - N35
18. კახა კუკავა – პ/გ „თავისუფალი საქართველო“ - N21
19. თამარ ცხორაგაული – პოლიტიკური მოძრაობა „თავისუფლება – ზვიად გამსახურდიას გზა“ - N31;
20. გიორგი ანდრიაძე – ამომრჩეველთა საინიციატივო ჯგუფი - N51
21. ვლადიმერ ნონიკაშვილი – ამომრჩეველთა საინიციატივო ჯგუფი - N62
22. კახაბერ ჭიჭინაძე – ამომრჩეველთა საინიციატივო ჯგუფი - N58
23. მიხეილ ანთაძე – მოძრაობა ,,სახელმწიფო ხალხისთვის“ - N1
24. ოთარ მეუნარგია – „მრეწველობა გადაარჩენს საქართველოს“ - N22
25. თეიმურაზ შაშიაშვილი – ამომრჩეველთა საინიციატივო ჯგუფი - N65
საქართველოში საპრეზიდენტო არჩევნების ჩასატარებლად ცენტრალური საარჩევნო კომისია საარჩევნო უბნებს 40 ქვეყანაში გახსნის. კანონის თანახმად, საზღვარგარეთ საარჩევნო უბნები ამუშავდება არა უგვიანეს 28 სექტემბრისა. საუბნო საარჩევნო კომისიების გახსნის შემდეგ უცხოეთში მცხოვრები ამომრჩევლები იქ მისვლას და რეგისტრაციაში გავლას შეძლებენ.
საქინფორმის შეკითხვაზე - გაიხსნება თუ არა საარჩევნო უბნები რუსეთის ფედერაციაში და თუ გაიხსნება, მაშინ რომელ ქალაქებში? - ცესკო-ს საინფორმაციო ცენტრში (ტელ. +599 32 2 51 00 51) გვიპასუხეს, რომ ამის შესახებ ჯერჯერობით არანაირი ინფორმაცია არ გააჩნიათ, ვინაიდან საქართველოს რუსეთთან დიპლომატიური ურთიერთობა არ აქვს. იმ ქვეყნების ჩამონათვალი, რომლებშიც საარჩევნო უბნები გაიხსნება, საქართველოს საგარეო საქმეთა სამინისტროსთან ერთად წყდება და ინფორმაცია ამის შესახებ ცესკო-ს ვებგვერდზე განთავსდება არაუგვიანეს 2018 წლის 28 სექტემბრისა“, - დააზუსტეს ცესკო-ში საქინფორმის შეკითხვის პასუხად.