თუ საქართველოში ნატოს სამხედრო ძალები განთავსდება, რუსეთი ადეკვატურ საპასუხო ზომებს მიმართავს - კონსტანტინე კოსაჩოვი
პოლიტიკა
თუ საქართველოში ნატოს სამხედრო ძალები განთავსდება, რუსეთი ადეკვატურ საპასუხო ზომებს მიმართავს - კონსტანტინე კოსაჩოვი

     საქართველო, 27 ივლისი, საქინფორმი. რუსეთის პარლამენტის ზედა პალატის საერთაშორისო ურთიერთობათა კომიტეტის თავმჯდომარის კონსტანტინ კოსაჩოვის თქმით, თუ საქართველო ნატოს წევრი გახდება და საქართველოში ალიანსის სამხედრო ძალები განთავსდება, რუსეთი ადეკვატურ საპასუხო ზომებს მიმართავს და შესაბამისი სამხედრო სამზადისი რუსეთის მხრიდანაც დაიწყება.

საქართველოს ნატოში გაწევრიანების შემთხვევაში თბილისის, სამხრეთ ოსეთისა და აფხაზეთის ურთიერთობების ნორმალიზება არარეალური გახდება, ასეთ შემთხვევაში საქართველოზე გავრცელდება ალიანსის სამხედრო მზადების პროგრამები, განლაგდებიან ახალი ტიპის შეიარაღება და ალიანსის ქვედანაყოფები. ეს ყველაფერი კი სამხრეთ კავკასიაში ახალ დაძაბულობას შექმნის და რუსეთის მხრიდან საპასუხო ზომებს გამოიწვევს. თუ რუსეთის საზღვრებთან ალიანსის ახალი სისტემები განლაგდება, მაშინ მოსკოვი მიმართავს ყველა ზომას რუსეთისა და მისი მოკავშირეების დასაცავად“, – განაცხადა კოსაჩოვმა.

მისივე თქმით, რუსეთი არასდროს ემუქრებოდა და ახლაც არ ემუქრება საქართველოს, ხოლო ის ქართველი პოლიტიკოსები, რომლებიც საქართველოს ალიანსში გაწევრიანებას მხარს უჭერენ, მხოლოდ მოკლევადიან პოლიტიკურ დღის წესრიგს მისდევენ.

შეგახსენებთ, რუსეთის პრეზიდენტმა ვლადიმერ პუტინმა 17 ივლისს ტელეკომპანია Fox News-თან ინტერვიუში განაცხადა, რომ რუსეთს საქართველოსა და უკრაინის ნატოში გაწევრიანებაზე უკიდურესად ნეგატიური რეაქცია ექნება.