გიორგი კვირიკაშვილის ქმედებებით ხშირად ირღვეოდა ბალანსი სახელმწიფო და ბიზნესის ინტერესებს შორის! - ივანიშვილი
სამართალი
გიორგი კვირიკაშვილის ქმედებებით ხშირად ირღვეოდა ბალანსი სახელმწიფო და ბიზნესის ინტერესებს შორის! - ივანიშვილი

     საქართველო, 26 ივლისი, საქინფორმი. პარტია ქართული ოცნება - დემოკრატიული საქართველოს თავმჯდომარის ბიძინა ივანიშვილი თქმით, შეხვედრაზე, რომელშიც უკვე ყოფილი პრემიერი კვირიკაშვილი, მთავრობის მაშინდელი წევრები და საპარლამენტო უმრავლესობის წარმომადგენლები მონაწილეობდნენ, გიორგი კვირიკაშვილის მისამართით საკმაოდ მძიმე შეკითხვები დაისვა. როგორც ივანიშვილმა პირველი არხის გადაცემაში „აქტუალური თემა მაკა ცინცაძესთან ერთად“ განაცხადა, შეხვედრაზე კვირიკაშვილსაც ჰქონდა პასუხების გაცემის შესაძლებლობა.

იყო შემთხვევები, როდესაც ირღვეოდა ბალანსი სახელმწიფოს ინტერესებსა და ბიზნესის ინტერესებს შორის და არღვევდა ამას კვირიკაშვილი თავისი ქმედებებით. რა თქმა უნდა, ლობირება ბიზნესის აუცილებელია ყველა ჩინოვნიკისგან. მე მოწოდებული ვარ, არა როგორც ჩინოვნიკი, არამედ როგორც მოქალაქე და იგივეს მოვუწოდებდი ყველას, რომ მაქსიმალური დახმარება, ლობირება უნდა გავუწიოთ შიგნითაც და განსაკუთრებით გარეთ, ექსპორტზე ჩვენს ბიზნესს. მაგრამ არც პრემიერსა და არც მინისტრს არ უნდა დაავიწყდეს, რომ მათ აქვთ კანონით განსაზღვრული სახელმწიფო ინტერესების დაცვა და ეს ბალანსი არ უნდა დაირღვეს. კითხვები იყო ძალიან მძიმე, საუბარი ალბათ სამი საათი გაგრძელდა, კვირიკაშვილს ჰქონდა გამოსვლის საშუალება და რამდენჯერმე შეეცადა საპირისპირო აზრის გამოთქმას. დასასრულს კარგად ჩანდა, კარგად დაინახა მანაც და მთელმა გუნდმაც, რომ მას აღარ ჰქონდა მართვის რესურსი. აღარ ჰქონდა ნდობა, არც პარლამენტში და არც მთავრობაში. ეს გახდა სწორედ მიზეზი მისი გადადგომის და არა ის, რომ ერთმა კაცმა და ივანიშვილმა დაიჟინა. იყო მკაცრი კითხვები, იყო ზომიერი კითხვებიც. გიორგი კვირიკაშვილს ჰქონდა პასუხის გაცემის შესაძლებლობა. შედეგი კარგად ჩანდა, შედეგი თავად კვირიკაშვილმაც დაინახა, მას აღარ დარჩა სხვა არჩევანი, ის უნდა წასულიყო და წავიდა კიდეც“, – განაცხადა ბიძინა ივანიშვილმა.

როგორც ბიძინა ივანიშვილმა აღნიშნა, თუ იქნება საჭიროება, შეუძლია, ამ საკითხებზე ოპონენტთან ერთადაც ისაუბროს. „უფრო დაწვრილებით რომ ვისაუბრო, ამას რამდენიმე საათი დასჭირდება და შეიძლება, საზოგადოება უფრო გაუგებრობაში დავტოვო. შეიძლება, მარტო და პირველ პირში საუბარმაც არ უშველოს. მე დამალული არაფერი მაქვს, შეხვედრაზეც ღიად და გამჭვირვალედ დავსვი კითხვები, პოზიციაც დავაფიქსირე. ასევე შემიძლია, საჯაროდაც ვისაუბრო, მაგრამ საზოგადოებას უფრო დავაბნევთ, ვიდრე ვაჩვენებთ უფრო ნათლად, რა მოხდა და როგორ განვითარდა მოვლენები“, – განაცხადა ივანიშვილმა.