საქართველოს პარლამენტის საგარეო ურთიერთობათა კომიტეტის თავმჯდომარის სოფიო ქაცარავას მიერ ინიცირებული რეზოლუცია „10 წელი აგვისტოს ომის შემდეგ“ ეუთო-ს საპარლამენტო ასამბლეამ ხმათა აბსოლუტური უმრავლესობით დაამტკიცა
პოლიტიკა
საქართველოს პარლამენტის საგარეო ურთიერთობათა კომიტეტის თავმჯდომარის სოფიო ქაცარავას მიერ ინიცირებული რეზოლუცია „10 წელი აგვისტოს ომის შემდეგ“ ეუთო-ს საპარლამენტო ასამბლეამ ხმათა აბსოლუტური უმრავლესობით დაამტკიცა

     საქართველო, 12 ივლისი, საქინფორმი. როგორც საქართველოს პარლამენტის საგარეო ურთიერთობათა კომიტეტის თავმჯდომარემ სოფიო ქაცარავამ განაცხადა, მიუხედავად ყველა ეტაპზე რუსეთის მხრიდან დიდი წინააღმდეგობებისა, პარტნიორების მხარდაჭერით, ეუთო-ს საპარლამენტო ასამბლეამ აბსოლუტური უმრავლესობით მიიღო რეზოლუცია „10 წელი აგვისტოს ომის შემდეგ.

მადლობას ვუხდი ჩვენი რეზოლუციის თანაინიციატორებს: ამერიკის შეერთებულ შტატების, კანადის, გერმანიის, ნორვეგიის, საფრანგეთის, ესპანეთის, ლატვიის, ლიეტუვას და რუმინეთის დელეგაციებს, რომ ასეთი მნიშვნელოვანი დოკუმენტის მიღება შევძელით”, – განაცხადა სოფო ქაცარავამ.

მუდმივმოქმედი დელეგაციის ხელმძღვანელის ინიცირებული რეზოლუციის მიხედვით, ეუთო- საპარლამენტო ასამბლეა რუსეთის ფედერაციას საქართველოს ტერიტორიებიდან სამხედრო ძალების გაყვანის და 2008 წლის 12 აგვისტოს ცეცხლის შეწყვეტის შეთანხმების სრულად შესრულებისკენ მოუწოდებს.

ასამბლეა ასევე გმობს საქართველოს მოქალაქეების ტატუნაშვილი, ოთხოზორია და ბაშარულის მკვლელობებს და რუსეთის ფედერაციისგან კატეგორიულად მოითხოვს, არ შეუშალოს ხელი საგამოძიებო პროცედურებ საერთაშორისო პარტნიორებთან ერთად ჩატარებას და ხელი შეუწყოს სამართლის აღსრულებას.

რეზოლუციაში ასახულია ადამიანის უფლებების საერთაშორისო სადამკვირვებლო მექანიზმების დაშვების აუცილებლობა და იძულებით გადაადგილებულ პირთა საკუთარ საცხოვრებელ ადგილებზე ღირსეული და უსაფრთხო დაბრუნების საჭიროება.

ეუთო-ს საპარლამენტო ასამბლეა მოუწოდებს ორგანიზაციას, გააძლიეროს ძალისხმევა სადამკვირვებლო მისიის სრულად აღდგენისთვის საქართველოს ტერიტორიაზე მის საერთაშორისოდ აღიარებულ საზღვრებში.

რეზოლუციაში ასამბლეა მიესალმება საქართველოს მთავრობის ახალ ინიციატივას ნაბიჯი უკეთესი მომავლისაკენ“, რაც კონფლიქტის მშვიდობიანი გზით მოგვარებისა და საოკუპაციო ხაზით დაშორიშორებული საზოგადოების დაახლოებისკენ არის მიმართული.

კენჭისყრას რუსეთის წარმომადგენლები არ ესწრებოდნენ.