საქართველო, 23 მაისი, საქინფორმი. საქართველოს პრემიერ-მინისტრის ვიზიტი აშშ-ში გრძელდება. აშშ-ის სახელმწიფო მდივნის მაიკ პომპეოს შეხვედრის შემდეგ საქართველოს პრემიერ-მინისტრ გიორგი კვირიკაშვილთან, რომლის შესახებ საქინფორმი იუწყებოდა, აშშ-ის სახელმწიფო დეპარტამენტის ვებგვერდზე მისი შემაჯამებელი განცხადების ტექსტი გამოქვეყნდა, რომლის მთავარი გზავნილებია:
- ამერიკის შეერთებული შტატების მხრიდან საქართველოს მხარდაჭერა კვლავ მტკიცეა და ასე გაგრძელდება მომავალშიც;
- აშშ საქართველოს გვერდით დგას და ამაყობს მასთან სტრატეგიული თანამშრომლობით;
- მიუხედავად იმისა, რომ საქართველოს ტერიტორიის 20 პროცენტი რუსეთის მიერ არის ოკუპირებული, ქვეყანა განაგრძობს რეფორმების პროცესს;
- ამერიკის შეერთებული შტატები გმობს რუსეთის აგრესიას და მხარს უჭერს საქართველოს სუვერენიტეტსა და ტერიტორიულ მთლიანობას;
- ძლიერი ეკონომიკა და ღია საზოგადოება საქართველოს უსაფრთხოების მთავარ საფუძველს წარმოადგენს;
- კანონის უზენაესობას, სასამართლო სისტემის დამოუკიდებლობასა და ანგარიშვალდებულ ხელისუფლებას ეკონომიკური და დემოკრატიული წინსვლისთვის განსაკუთრებული მნიშვნელობა აქვს;
- საქართველო ნატოს ერთ-ერთი ყველაზე აქტიური პარტნიორია. აშშ და საქართველო უსაფრთხოების საკითხებში მჭიდრო თანამშრომლობას განაგრძობენ.