საქართველო, 22 მაისი, საქინფორმი. ამის შესახებ პირველ არხს პრეზიდენტის ადმინისტრაციიდან აცნობეს. ლიტვის, ლატვიის, ფინეთის, პოლონეთის, სლოვაკეთის, სომხეთის პრეზიდენტებსა და ევროკომისიის პრეზიდენტს საქართველოს პრეზიდენტი გიორგი მარგველაშვილი უმასპინძლებს. უმაღლესი დონის სტუმრები საზეიმო ღონისძიებებს საქართველოს პრეზიდენტთან ერთად დაესწრებიან.
„ლიტვის, ლატვიის, ფინეთის, პოლონეთის, სლოვაკეთის, სომხეთის პრეზიდენტები და ევროკომისიის პრეზიდენტი თავისუფლების მოედანზე წვევამდელების სამხედრო ფიცის დადების ცერემონიას დაესწრებიან. პარლამენტში კი მონაწილეობას მიიღებენ მრგვალი მაგიდის მუშაობაში – „თანამშრომლობა კეთილდღეობისათვის – მომავალი ასწლეულის სტრატეგია“.
საქართველოს დამოუკიდებლობის დღეს ეძღვნება „კრინიცას საერთაშორისო ეკონომიკური ფორუმი თბილისში”, რომლის მუშაობაშიც მონაწილეობას მიიღებენ საქართველოს, პოლონეთისა და სლოვაკეთის პრეზიდენტები და სტუმრებს სიტყვით მიმართავენ.
26 მაისს განსაკუთრებულად საზეიმოდ აღინიშნება 17:10 საათი, ზუსტად ის დრო, როდესაც 1918 წელს ნოე ჟორდანიამ საქართველოს დამოუკიდებლობა გამოაცხადა. საქართველოს პრეზიდენტი სტუმრებთან ერთად თბილისში, მოსწავლე-ახალგაზრდობის ეროვნულ სასახლეში (რუსეთის იმპერატორის ნაცვლის ყოფილ სასახლეში - საქინფორმი) 100 წლის წინანდელი მოვლენის თეატრალიზებულ ინსცენირებას დაესწრება.
26 მაისს საღამოს კი უმაღლესი რანგის სტუმრები ოპერისა და ბალეტის სახელმწიფო თეატრში ნინო ანანიაშვილის, „სუხიშვილებისა“ და „ბასიანის“ მონაწილეობით გამართულ კონცერტს დაესწრებიან“, - აღნიშნულია პრეზიდენტის ადმინისტრაციის მიერ გავრცელებულ ინფორმაციაში.