ბოლო ერთ თვეში შსს-მ სხვადასხვა ტიპის 130 ცეცხლსასროლი იარაღი და დიდი რაოდენობით საბრძოლო მასალა ამოიღო (ვიდეო)
სამართალი
ბოლო ერთ თვეში შსს-მ სხვადასხვა ტიპის 130 ცეცხლსასროლი იარაღი და დიდი რაოდენობით საბრძოლო მასალა ამოიღო (ვიდეო)

     საქართველო, 1 მაისი, საქინფორმი. შინაგან საქმეთა სამინისტროს ცნობით, სამართალდამცველებმა ბოლო ერთი თვის განმავლობაში, მთელი ქვეყნის მასშტაბით, ცეცხლსასროლი იარაღისა და საბრძოლო მასალის უკანონო შეძენა-შენახვის და ტარების 324 ფაქტზე გამოძიება დაიწყეს (ვიდეო იხ. აქ).
უწყების ცნობით, 72 პირის მიმართ მიმდინარეობს სისხლისსამართლებრივი დევნა.
ამავე პერიოდში, შინაგან საქმეთა სამინისტროს თანამშრომლებმა ამოიღეს:
ავტომატური ცეცხლსასროლი იარაღი – 12;
კარაბინები, შაშხანები და სანადირო თოფები – 73;
ცეცხლსასროლი პისტოლეტები და რევოლვერები – 34;
თვითნაკეთი, კუსტარული და გადაკეთებული ცეცხლსასროლი იარაღი – 11;
აირის, ხმოვანი და პნევმატური იარაღი – 18;
ასევე, დიდი ოდენობით სხვადასხვა სახეობის და კალიბრის საბრძოლო ვაზნა.
აღსანიშნავია, რომ პირველი იანვრიდან დღემდე, ცეცხლსასროლი იარაღისა და საბრძოლო მასალის უკანონო შეძენა-შენახვის ან ტარების 659 ფაქტზე დაიწყო გამოძიება. 155 პირის მიმართ დაწყებულია სამართლებრივი დევნა საქართველოს სსკ-ის 236-ე მუხლით.
შინაგან საქმეთა სამინისტრო კვლავ აქტიურად განაგრძობს უკანონო იარაღისა და საბრძოლო მასალის ამოღებას, რაც უწყების მიერ მძიმე დანაშაულების პრევენციის მიზნით განხორციელებული ღონისძიებების ერთ-ერთი მნიშვნელოვანი კომპონენტია“, - აღნიშნულია შსს-ს მიერ გავრცელებულ განცხადებაში.